უნაი ემერის ახალი სამიზნე და ხელისშემშლელი ფაქტორები

ასტონ ვილა საკუთარი ისტორიის ერთ-ერთ ყველაზე წარმატებულ სეზონს ზეიმობს და უნაი ემერის ხელმძღვანელობით პროგრესის გაგრძელებას გეგმავს.

გასულ კვირას გუნდი ევროპა ლიგის გამარჯვებული გახდა, ხოლო კვირას, პრემიერ ლიგის ბოლო ტურში, მანჩესტერ სიტი 2-1 დაამარცხა (რაც პეპ გვარდიოლას ბოლო მატჩი იყო ეტიჰადზე), მეოთხე ადგილი დაიკავა და ჩემპიონთა ლიგის საგზური მოიპოვა.

ახლა ემერი შემადგენლობის გაძლიერებას გეგმავს და მისი ერთ-ერთი მთავარი სამიზნე ნიუკასლის შემტევი, ჰარვი ბარნსია, რომელსაც გუნდში სისწრაფის მომატება შეუძლია. 28 წლის ბარნსი, რომელიც კვირაში 80,000 ფუნტს გამომუშავებს, ნიუკასლს 2023 წელს ლესტერიდან 38 მილიონ ფუნტად შეუერთდა. მან მიმდინარე სეზონში 16 გოლითა და 6 ასისტით გამოიჩინა თავი.

ვინაიდან ნიუკასლმა ევროთასების საგზური ვერ მოიპოვა, ჩემპიონთა ლიგაზე თამაშის პერსპექტივამ შესაძლოა ბარნსს ვილაში გადასვლა გადააწყვეტინოს. თანაც, მისი ოჯახი ისევ მიდლენდში ცხოვრობს და კლუბის შეცვლით მათთან უფრო ახლოს იქნება.

ამ ტრანსფერის გზაზე გარკვეული პრობლემებიც არსებობს. პირველ რიგში, ასტონ ვილას ფინანსური ბალანსისთვის თავადაც სჭირდება ფეხბურთელების გაყიდვა. ვილა მზად არის შეელიოს მორგან როჯერსს, თუმცა მასში მინიმუმ 80 მილიონს ითხოვს, რაც კლუბს სატრანსფერო ბაზარზე დიდ თავისუფლებას მისცემს.

რაც შეეხება თავისუფალ ადგილს შემტევ ხაზში, ბარნსისთვის სივრცე როჯერსის გაყიდვის გარეშეც გამოთავისუფლდება, რადგან ჯეიდონ სანჩო, რომელიც გუნდში იჯარით იმყოფებოდა, კლუბს ტოვებს და თავისუფალი აგენტი ხდება. ვილას გეგმები ბარნსთან დაკავშირებით შესაძლოა მისმა თანაგუნდელმა, ენტონი გორდონმაც ჩაშალოს. გორდონს აქტიურად უკავშირებენ მიუნხენის ბაიერნს და თუ ის გერმანიაში გადაბარგდება, ნიუკასლი ბარნსის გაშვებაზე აუცილებლად იტყვის უარს.