ევროპა ლიგის საკვალიფიკაციო ეტაპის პლეი-ოფში, იაგელონიასთან პირველი მატჩის წინ, იბერია 1999-ის მთავარმა მწვრთნელმა, ანდრი დემჩენკომ შეფასებები გააკეთა.
"ძალიან ძლიერ მეტოქესთან მოგვიწევს თამაში, ამიტომ ძალიან რთული შეხვედრა გველოდება.
ყოველდღე ვხედავ, როგორ შრომობს, უმატებს და ემზადება ჩემი გუნდი. ამიტომ, არანაირი ნერვიულობა და აღელვება არ გვაქვს. ჩვენს ფეხბურთს ვითამაშებთ და ვნახოთ, მოვლენები როგორ განვითარდება. არაფრის გვეშინია.
ბიჭები ძალიან სერიოზულად არიან განწყობილი, დასაკარგი არაფერი გვაქვს და შეგვიძლია, კიდევ უფრო გავძლიერდეთ და ისტორია კიდევ ერთხელ გადავწეროთ, კიდევ უფრო ღრმა კვალი დავტოვოთ.
სტრესი აღარ არის, რადგან ჩვენი პროგრამა მინიმუმი უკვე შევასრულეთ, ახლა კი მაქსიმალური ამოცანის შესრულებაზე ვიზრუნებთ. ბიჭებს ვეუბნებოდი, რომ 22 წლის შემდეგ ევროტურნირის მთავარ ეტაპზე გასვლა შეგვეძლო და ეს უკვე მიღწეულია.
ქუთაისში წაგებულმა თამაშმაც კი გარკვეული თავდაჯერება შეგვმატა და საკუთარ ძალებში დაგვარწმუნა. ბიჭები ძალებითა და შესაძლებლობებით სავსე არიან, ძალიან უნდათ ღირსეული ბრძოლა გამართონ.
ბოლო მატჩი 15 რიცხვში ჩავატარეთ, ახლა 20-ში ვთამაშობთ - 5 დღე დასასვენებლად საკმარისი დროა, ევროპაში გაცილებით უფრო მჭიდრო გრაფიკით თამაშობენ. 5 დღე სრულიად საკმარისია, გუნდმა აღდგენა გააკეთა და ხვალ ბრძოლის გასამართად მზადაა", - დემჩენკოს კომენტარს იბერიას სოციალური მედია ავრცელებს.
იაგელონიასა და იბერია 1999-ის მატჩი ჩვენი დროით 20:00 საათიდან იწყება (ადგილობრივი დროით 18:00) და მის პირდაპირ რეპორტაჟს Silk უნივერსალი-ზე ვნახავთ.
მატჩისდღე - ყველაფერი, რაც იბერიას თამაშის დაწყებამდე უნდა ვიცოდეთ
