პირველად 2018 წლის შემდეგ — არსენალი ინგლისის ლიგის თასის ფინალშია.
მიკელ არტეტას არსენალი ინგლისის ლიგის თასის ფინალში ითამაშებს. ნახევარფინალის განმეორებით შეხვედრაში „მეთოფეებმა“ ჩელსი მინიმალური ანგარიშით, 1:0 დაამარცხეს და გადამწყვეტი მატჩის საგზური მოიპოვეს. აღსანიშნავია, რომ ლონდონური კლუბი ამ ტურნირის ფინალში 2018 წლის შემდეგ პირველად გავიდა.
VIDEO: ემირეითსზე ჩელსის ქამბექი ვერ შედგა — არსენალი კარაბაო თასის პირველი ფინალისტია
არსენალისთვის ეს ისტორიაში მე-9 ფინალი იქნება. ამ მაჩვენებლით გუნდი ინგლისური ფეხბურთის ელიტაშია: ფინალებში უფრო ხშირად მხოლოდ ლივერპული (15), მანჩესტერ იუნაიტედი (10) და ჩელსი (10) გასულან. რაც შეეხება მანჩესტერ სიტის, ტოტენჰემსა და ასტონ ვილას, მათ ანგარიშზე, არსენალის მსგავსად, 9-9 ფინალია.
მიუხედავად იმისა, რომ „მეთოფეები“ ფინალში ხშირად ხვდებიან, ტიტულის მოპოვებას გუნდი უკვე დიდი ხანია ვერ ახერხებს. არსენალმა ინგლისის ლიგის თასი ბოლოს 1993 წელს აღმართა და ახლა არტეტას გუნდს აქვს შანსი, ეს 33-წლიანი პაუზა დაასრულოს.
ფინალურ შეხვედრაში არსენალი ან მან სიტის დაუპირისპირდება, ან ნიუკასლს.
