„ეს პლანეტის უდიდესი კლუბია“ - გორდონის პირველი სიტყვები ბარსაში

ენტონი გორდონმა ბარსელონაში ტრანსფერის დასრულების შემდეგ სიამაყე და აღფრთოვანება ვერ დამალა.

25 წლის ინგლისელმა შემტევმა კატალონიურ გრანდთან 5-წლიანი კონტრაქტი გააფორმა, რითაც ბავშვობის ოცნება აისრულა. ბარსელონამ ნიუკასლ იუნაიტედის ვარსკვლავის სანაცვლოდ, ბონუსების ჩათვლით, 80 მილიონი ევრო გადაიხადა.

გასულ სეზონში გორდონი ნიუკასლ იუნაიტედის საუკეთესო ბომბარდირი გახდა 17 გატანილი გოლით. პარასკევს გამართულ ოფიციალურ პრეზენტაციაზე ფეხბურთელმა აღნიშნა, რომ კატალონიელთა ინტერესის შესახებ გაგებისთანავე სხვა ვარიანტებზე აღარც უფიქრია:

როგორც კი გავიგე, რომ ბარსას ვარიანტი სერიოზული იყო, ეჭვიც არ შემპარვია. ყოველთვის აქ თამაში მინდოდა. ბარსა პლანეტის უდიდესი კლუბია. ამაზე ბავშვობიდან ვოცნებობდი და ეს ოცნება ახდა. ვიცი, რომ ამას დიდი პასუხისმგებლობა ახლავს, მაგრამ ასეთი გამოწვევისთვის მზად ვარ. ვიცი, ვის ეცვა ეს მაისური წარსულში... მას დიდი წონა აქვს, თუმცა გამოწვევა მახარებს

ინგლისელმა შემტევმა ახალ თანაგუნდელებზეც ისაუბრა და განსაკუთრებით ლამინ იამალთან ერთად თამაშის პერსპექტივა გამოყო:

„ლამინთან და სხვა ფეხბურთელებთან ერთად თამაში ჩემთვის ძალიან ამაღელვებელია. ვფიქრობ, რაც უფრო მეტი მაღალი კლასის მოთამაშეა შენ გარშემო, მით უფრო უკეთესი ხდები. ეს ბიჭები უმაღლეს დონეზე მიზეზის გამო არიან - ისინი მსოფლიოში საუკეთესოები გახლავან. იმდენად დიდი კლასი აქვთ, რომ როდესაც ნიუკასლით სენტ ჯეიმს პარკზე მათ ვეთამაშეთ, ბურთს საერთოდ ვერ ვეხებოდით.“

ამ სწრაფი ტრანსფერით ბარსელონამ მიუნხენის ბაიერნი დაამარცხა, რომელსაც ინგლისელის შეძენა თავისი ვარსკვლავური თავდასხმის ხაზის გასაძლიერებლად სურდა. ახლა კი, როდესაც კლუბის საკითხი გარკვეულია, გორდონი სრულად გადაერთვება ინგლისის ნაკრებზე და 2026 წლის მსოფლიო ჩემპიონატისთვის დაიწყებს მზადებას.