ესპანეთის ბანაკში არეულობაა

ესპანეთის ნაკრების ბანაკში, სადაც გუნდი მსოფლიო ჩემპიონატისთვის ემზადება, სერიოზული ინციდენტი მოხდა.

ბარსელონას ნახევარმცველის, გავის გადამეტებულმა აგრესიამ ვარჯიშზე გუნდის ერთ-ერთი ლიდერი მძიმე ტრავმის საფრთხის წინაშე დააყენა. ამ შემთხვევას მწვრთნელებისა და ფეხბურთელების მძაფრი რეაქცია მოჰყვა.

უხეში ვარჯიში და როდრის ტრავმა

ჩატანუგაში მიმდინარე საწვრთნელ პროცესში, გავიმ ჩვეული, ხშირად უხეში სტილით ითამაშა და ორთაბრძოლისას მანჩესტერ სიტის საყრდენს, როდრის კოჭში ბუცის თვლები ჩაარტყა. როდრი მოედანზე ტკივილისგან დაეცა, რამაც სამწვრთნელო შტაბი საგონებელში ჩააგდო - მუნდიალის დაწყებამდე სულ რამდენიმე დღეა დარჩენილი და მისი დაკარგვა კატასტროფა იქნებოდა.

გავიმ ეგრევე ბოდიში მოიხადა. საბედნიეროდ, ექიმების ჩარევის შემდეგ როდრიმ ფეხზე დადგომა შეძლო და ვარჯიში კოჭლობით, თუმცა ბოლომდე ჩაამთავრა. სერიოზული დაზიანების შიში ამ ეტაპზე გადავლილია.

სიახლეები ლაზარეთიდან და პერუს მატჩი

ინციდენტის მიღმა, ლუის დე ლა ფუენტესთვის პოზიტიური ამბებიც არის: ლამინ იამალმა და ნიკო უილიამსმა რეაბილიტაციის პროცესი დაიწყეს. კუნთის ტრავმების გამო მათ თითქმის ერთი თვე გამოტოვეს. ფეხბურთელებმა მოთელვაში მიიღეს მონაწილეობა, თუმცა მწვრთნელები მათ კონტაქტურ ორთაბრძოლებს არიდებენ. ისინი პერუსთან უახლოეს ამხანაგურ მატჩს გამოტოვებენ.

პერუსთან შეხვედრისთვის გუნდს დაუბრუნდება რამდენიმე წამყვანი მოთამაშე, მათ შორის პედრი და კუკურელია. ესპანეთის ნაკრები მექსიკაში მიფრინავს, სადაც ბოლო მოსამზადებელ ეტაპს გაივლის, 15 ივნისს კი მსოფლიო ჩემპიონატს კაბო-ვერდესთან მატჩით დაიწყებს.