FIFA დონალდ ტრამპს სთხოვს, მსოფლიო ჩემპიონატის დროს ICE-ის რეიდები შეაჩეროს.
FIFA-ს ხელმძღვანელობა განიხილავს შესაძლებლობას, აშშ-ის პრეზიდენტს, დონალდ ტრამპს თხოვნით მიმართოს, რათა 2026 წლის მსოფლიო ჩემპიონატის მიმდინარეობისას საიმიგრაციო და საბაჟო კონტროლის სამსახურის (ICE) რეიდები შეჩერდეს.
როგორც The Athletic იუწყება, 39-დღიანი ტურნირის განმავლობაში საიმიგრაციო კონტროლზე მორატორიუმის გამოცხადება შესაძლოა წარმოდგენილი იყოს როგორც „ორმხრივი მოგება“ (win-win) როგორც ტრამპის ადმინისტრაციისთვის, ისე საერთაშორისო საფეხბურთო ორგანიზაციისთვის. მორატორიუმმა უნდა გააქარწყლოს იმ ქვეყნების შიში, რომლებიც მსოფლიო ჩემპიონატის დროს ICE-ის აგრესიული ოპერაციების გამო შეშფოთებულნი არიან.
ლოზუნგი: „FIFA აერთიანებს მსოფლიოს“
ტურნირის დაწყებამდე ორ თვეზე ნაკლები რჩება. FIFA-ს პრეზიდენტი ჯანი ინფანტინო, რომელსაც ტრამპთან ახლო ურთიერთობა აქვს, გეგმავს პრეზიდენტს პირადად დაელაპარაკოს. თავდაპირველად განიხილებოდა რეიდების შეჩერება მხოლოდ მასპინძელ 11 ქალაქში, თუმცა მოგვიანებით გეგმა გაფართოვდა და მოიცვალ მთელი ქვეყნის მასშტაბი, რათა სტუმრებმა და მონაწილეებმა თავი დაცულად იგრძნონ.
ინფანტინოს იმედი აქვს, რომ მისი პირადი კონტაქტი ტრამპთან შედეგს გამოიღებს. შეგახსენებთ, რომ დეკემბერში ინფანტინომ ტრამპს FIFA-ს მშვიდობის პირველი პრიზიც კი გადასცა.
თეთრი სახლის პოზიცია
ჯერჯერობით გაურკვეველია, დათანხმდება თუ არა ტრამპი ამ წინადადებას. საიმიგრაციო პოლიტიკის შერბილება ეწინააღმდეგება მის წინასაარჩევნო დაპირებებს. თეთრი სახლის სპიკერმა, დეივის ინგლიმ პირდაპირ პასუხს თავი აარიდა, თუმცა აღნიშნა: „პრეზიდენტ ტრამპის ლიდერობით, 2026 წლის მსოფლიო ჩემპიონატი კაცობრიობის ისტორიაში ერთ-ერთი ყველაზე შთამბეჭდავი მოვლენა იქნება. პრეზიდენტი ფოკუსირებულია იმაზე, რომ ტურნირი იყოს ყველაზე უსაფრთხო ისტორიაში“.
