იბერია 1999-მა ისტორია დაწერა და დამოუკიდებელი საქართველოს ისტორიაში მეორე კლუბი გახდა, რომელიც ევროთასების ფინალურ ეტაპზე იასპარეზებს - უკანასკნელად ეს 22 წლის წინ თბილისის დინამომ შეძლო. იბერია უეფას კონფერენს ლიგაზე ასპარეზობას 15 ოქტომბრიდან დაიწყებს - მანამდე კი ჩვენს ბლოგების სერიაში დედაქალაქური კლუბის ფეხბურთელებს გაგაცნობთ.
დღევანდელ ბლოგში იბერიას ცხრიანის, ამირან ძაგანიას შესახებ მოგიყვებით. ამირანი 2001 წლის 13 ნოემბერს თბილისში დაიბადა. ისევე როგორც ბევრმა ქართველმა ფეხბურთზე შეყვარებულმა ბავშვმა, ამირანმაც პირველი ნაბიჯები ნორჩი დინამოს აკადემიაში გადადგა.
ძაგანია ბავშვობიდან არაერთი სპორტით იყო დაინტერესებული - ლეო მესიმ, ზლატან იბრაჰიმოვიჩმა, ლებრონ ჯეიმსმა, მაიკ ტაისონმა და როჯერ ფედერერმა ამირანზე დიდი შთაბეჭდილება მოახდინეს.
რომ არა ფეხბურთელი, მაინც სპორტსმენი ვიქნებოდი, აუცილებლად.
ძაგანიას პირველი პროფესიონალური კლუბი ვიტ ჯორჯია იყო - სადაც ფორვარდმა ოთხი სეზონი გაატარა. ამ პერიოდში ამირანი ეროვნული ლიგა 2-ის ერთ-ერთ საუკეთესო ფეხბურთელად ჩამოყალიბდა - ძაგანიამ 98 მატჩი თავი 42 გოლისა და 11 საგოლე გადაცემას მოუყარა.
2025 წელს ძაგანია იბერია 1999-ს შეუერთდა და გასულ სეზონში ჩემპიონებს 7 გოლით დაეხმარა. წინა სეზონში ამირანმა არაერთი შეხვედრა იბერია 2-ის შემადგენლობაშიც ჩაატარა, სადაც 17 მატჩში 4 გოლი გაიტანა.
მიმდინარე სეზონში ძაგანიას ანგარიშზე 25 მატჩში 7 გოლი და ერთი საგოლე გადაცემაა, მათ შორის გოლები ქუთაისის ტორპედოს, ბათუმის დინამოსა და რუსთავის კარში - ამ უკანასკნელს ძაგანიამ სამივე თამაშში გაუტანა. ძაგანია ეროვნული ლიგის აპრილის თვის საუკეთესო ფეხბურთელად დასახელდა.
ამირანი სან სიროზე თამაშზე ოცნებობს, ფრენსის ფორდ კოპოლას ნათლია მისი საყვარელი ფილმია, ხოლო სატელევიზიო შოუებში განსაკუთრებით უოლტერ უაითისა და ჯესი პინკმენის კრიმინალური თავგადასავალი უყვარს. ძაგანიას საყვარელი მუსიკოსი კი ინგლისელი როკ და ბლუზ მომღერალი კრის რეაა.
