ქართველი სპორტსმენი, მოჭიდავე და MMA-ის მებრძოლი ნიკოლოზ ბიბილაშვილი გარდაიცვალა.
,,ნიკოლოზ ბიბილაშვილი, გორის შოთა ჩოჩიშვილის სახელობის კომპლექსურ სპორტულ სკოლაში ვარჯიშობდა და იქ დაოსტატდა. ის წარმატებით ასპარეზობდა ძიუდოში, სამბოსა და ქართულ ჭიდაობაში. იყო საქართველოს ძიუდოს და სამბოს ნაკრებების წევრი, განსაკუთრებული მიღწევები კი სამბოში ჰქონდა.
ნიკოლოზ ბიბილაშვილი იყო ევროპის და მსოფლიოს ჩემპიონი ახალგაზრდებში (ორივე - 1999 წელი), დიდებში - 2000 წელს გახდა ევროპის ჩემპიონი, იყო აგრეთვე, ევროპის ვიცე-ჩემპიონი (1999) და 3-გზის (2002, 2003, 2004) ბრინჯაოს პრიზიორი. მსოფლიოს ჩემპიონატებზე დიდებში კი, 3-ჯერ ფლობდა ბრინჯაოს მედალს (1998, 1999, 2000)
ნიკოლოზი, კარგი სპორტსმენი და კარგი პიროვნება, გორის სპორტული საზოგადოების ღირსეული წარმომადგენელი გახლდათ. იგი ძალიან დააკლდება ჩვენს ქალაქს და სპორტულ საზოგადოებას.
ვუსამძიმრებთ ნიკოლოზ ბიბილაშვილის ოჯახს, ახლობლებს, მეგობრებს..." - წერს გორის მუნიციპალიტეტის სპორტის განვითარებისა და ხელშეწყობის სააგენტო.
ბიბილაშვილი აქტიურ კარიერას MMA-შიც აგრძელებდა. სულ რაღაც 3 კვირის წინ მან GFC-ის მძიმე წონის ჩემპიონის ტიტულისთვის იბრძოლა.