გერმანიის ნაკრების მორიგი მუნდიალური კრახის შემდეგ, საფეხბურთო სამყარო იულიან ნაგელსმანის სასწრაფო გადაყენებას და მის ნაცვლად იურგენ კლოპის მოყვანას ითხოვს.
პარაგვაისთან 1/16 ფინალში პენალტების სერიაში გამოვარდნა (4:3) გერმანული ფეხბურთისთვის ბოლო წლების კიდევ ერთი უმძიმესი დარტყმა აღმოჩნდა. მიუხედავად იმისა, რომ ნაგელსმანს კონტრაქტი 2028 წლამდე აქვს და აცხადებს, რომ პოსტის დატოვებას თავისი ნებით არ აპირებს, გერმანიის ფეხბურთის კავშირმა (DFB) ძველი შეცდომები არ უნდა გაიმეოროს და გადაწყვეტილება არ უნდა გააჭიანუროს.
ნაგელსმანმა ბოლო ორ წელიწადში ხალხის ნდობა სრულად დაკარგა. პრესკონფერენციებზე საკუთარი ფეხბურთელების საჯარო კრიტიკამ, ტაქტიკურმა არეულობამ და კაპიტან ჯოშუა კიმიხის პოზიციების მუდმივმა ცვლამ გუნდს შიდა სტაბილურობა დაუკარგა. გარდა ამისა, მწვრთნელს არ აპატიეს 40 წლის მანუელ ნოიერის ნაკრებში მოულოდნელი დაბრუნება, რამაც საკვალიფიკაციო ეტაპის გმირს, ოლივერ ბაუმანს, ძირითადში თამაშის შანსი წაართვა, თავად ნოიერმა კი ტურნირზე განსაკუთრებული ვერაფერი აჩვენა.
გერმანიის ნაკრების თამაშს კრეატივი აკლდა, რაც იურგენ კლოპმა ტელეეკრანებიდან პირდაპირ ეთერში გააკრიტიკა. ლივერპულის ყოფილმა დამრიგებელმა აღნიშნა, რომ გუნდმა ფლანგებიდან შეტევა საერთოდ ვერ შეძლო, ფეხბურთელებმა საკუთარი პოტენციალი მოედანზე ვერ გადაიტანეს და პარაგვაისნაირი საშუალო დონის მეტოქე მარტივად გაუშვეს ხელიდან. კლოპის თქმით, გერმანულ ფეხბურთში ბევრი რამ ძირეულად არის შესაცვლელი.
გულშემატკივრებისა და ექსპერტების მთავარი ოცნება სწორედ იურგენ კლოპის ნაკრებში ხილვაა, რომელიც ამჟამად რედ ბულის საფეხბურთო სტრუქტურას ხელმძღვანელობს. თავად კლოპი ბოსტონში ამ თემაზე საუბარს მოერიდა და აღნიშნა, რომ თავისი ამჟამინდელი სამსახური მოსწონს, თუმცა DFB-მ ნაგელსმანის გათავისუფლება არ უნდა დააყოვნოს. თუ გერმანიას ევრო 2028-სა და მუნდიალ 2030-ზე წარმატება სურს, კლოპის დანიშვნაზე მუშაობა ახლავე უნდა დაიწყოს.
