ინგლისის ნაკრებისა და მადრიდის რეალის ვარსკვლავმა ჯუდ ბელინგემმა საფეხბურთო კარიერის დასრულების შემდეგ საკუთარ გეგმებზე ისაუბრა და საზოგადოება მოულოდნელი განცხადებით გააკვირვა.
ტელეკომპანია Fox-ის ეთერში, ჯეიმს კორდენთან სტუმრობისას, 23 წლის ნახევარმცველმა აღიარა, რომ კინოინდუსტრიაში ბედის ცდა და მისთვის სათაყვანებელი აგენტ 007-ის, იგივე ჯეიმს ბონდის როლის შესრულება სურს. ბელინგემმა პირდაპირ ეთერში ბონდის ცნობილი ფრაზაც კი გაიმეორა და იხუმრა, რომ ამ როლის მიღების კარგი შანსი აქვს.
ბელინგემმა აღნიშნა, რომ ფრენჩაიზის დიდი ფანია და შონ კონერისა თუ როჯერ მურის მონაწილეობით ყველა ფილმი ნანახი აქვს. გადაცემაში მან იუმორისტულ სცენებშიც მიიღო მონაწილეობა და კამერების წინ დიდი არტისტულობა გამოავლინა. თუმცა, ბონდიანას კასტინგის ყოფილმა დირექტორმა, დები მაკუილიამსმა აღნიშნა, რომ ფეხბურთელის ზედმეტად დიდი გლობალური პოპულარობა შესაძლოა ამ როლისთვის ხელისშემშლელი აღმოჩნდეს, რადგან საიდუმლო აგენტის პერსონაჟს მეტი იდუმალება სჭირდება.
ჰოლივუდის ამბიციების მიუხედავად, ახალგაზრდა ვარსკვლავისთვის მთავარ პრიორიტეტად მიმდინარე 2026 წლის მსოფლიო ჩემპიონატი რჩება. ბელინგემმა ჯგუფურ ეტაპზე ხორვატიასთან, განასა და პანამასთან მატჩებში ფანტასტიკური ფეხბურთი აჩვენა, ორჯერ ტურნირის საუკეთესო მოთამაშედ დასახელდა და ინგლისის ნაკრების ნამდვილ ლიდერად მოგვევლინა.
ახლა თომას ტუხელის გუნდი 1/16 ფინალური მატჩისთვის ემზადება, სადაც კონგოს დემოკრატიულ რესპუბლიკას დაუპირისპირდება. ინგლისელი გულშემატკივრები იმედოვნებენ, რომ აგენტი ჯუდი მორიგ ბრწყინვალე მატჩს ჩაატარებს და მათ მთავარ ოცნებას აასრულებს - ფეხბურთს მის ისტორიულ სამშობლოში დააბრუნებს.
