ეს ცოტა მოულოდნელი იყო - ჰაიდენჰაიმთან 1:3 დამარცხების შემდეგ, კვირა ღამეს უნიონ ბერლინმა გამოაცხადა, რომ მთავარი მწვრთნელი შტეფენ ბაუმგარტი და მისი ასისტენტები დაკავებული თანამდებობებიდან გათავისუფლდნენ.
„გვსურს მადლობა გადავუხადოთ მათ გაწეული მუშაობისთვის. სწორედ მათი დამსახურებაა, რომ გასულ სეზონში ლიგაში ადგილი შევინარჩუნეთ და მიმდინარე კამპანიის პირველ ნახევარშიც ქულების კარგი მარაგი დავაგროვეთ. ვუსურვებთ მათ წარმატებებს როგორც პროფესიულ, ისე პირად ცხოვრებაში,“ - ციტირებს დედაქალაქური კლუბი X-ზე მმართველი დირექტორის, ჰორსტ ჰელდტის სიტყვებს.
ბაუმგარტი წავიდა, მის ადგილს კი ქალი დაიკავებს - ყოველ შემთხვევაში, დროებით. როგორც უნიონმა იმავე პლატფორმაზე განაცხადა, ბუნდესლიგის გუნდს სეზონის ბოლომდე მარი-ლუიზ ეტა უხელმძღვანელებს. ის მანამდე 19-წლამდელთა გუნდს ავარჯიშებდა და კლუბის ქალთა მთავარი გუნდის მომავალ მწვრთნელად მოიაზრებოდა.
მან მოვალეობის შესრულება დაუყოვნებლივ დაიწყო და აღნიშნა, რომ მოხარულია კლუბის მხრიდან გამოცხადებული ნდობით:
უნიონის ერთ-ერთი მთავარი ძალა ყოველთვის იყო და არის ძალების გაერთიანება მსგავს სიტუაციებში. რა თქმა უნდა, დარწმუნებული ვარ, რომ ამ გუნდთან ერთად სეზონის ფინალურ ეტაპზე გადამწყვეტ ქულებს მოვიპოვებთ.
