ჰამილტონის კრახი და ნორისის პოზიცია: დიდი ბრძოლა უნგრეთში

უნგრეთის გრან-პრის კვალიფიკაცია ნამდვილ დრამად იქცა.

მაკლარენის პილოტმა და მოქმედმა მსოფლიო ჩემპიონმა, ლანდო ნორისმა 2026 წლის სეზონში პირველი პოულ პოზიცია მოიპოვა, თუმცა ბრიტანელი მრბოლელი გამარჯვების წინასწარ ზეიმს არ ჩქარობს.

კვალიფიკაციის მთავარი ანტიგმირი შვიდგზის მსოფლიო ჩემპიონი ლუის ჰამილტონი გახდა. ფერარის პილოტი ფინალური სესიის დასაწყისში უსწრაფესი იყო, თუმცა გადამწყვეტი წრის დასრულების შემდეგ მან მაკლარენის ავსტრალიელი პილოტი ოსკარ პიასტრი დაბლოკა, რის გამოც მსაჯებმა ის სამი პოზიციით დააჯარიმეს. ფერარის შეფმა ფრედერიკ ვასორმა შეცდომა საკუთარ თავზე აიღო, რადგან გუნდმა ჰამილტონს უკნიდან მომავალი პიასტრის შესახებ დროულად არ შეატყობინა.

"ზოგჯერ უბრალოდ არ გიმართლებს. კიდევ ერთი უქმეები, როცა თავს იდეალურად ვგრძნობდი და მერე უცებ ყველაფერი თავზე დამენგრა. ზედიზედ სამ რბოლაში ჯარიმის მიღების შემდეგ, პოზიტივის შენარჩუნება ძალიან მიჭირს", - დაწერა იმედგაცრუებულმა ჰამილტონმა სოციალურ ქსელში. ჯარიმების გამო ჰამილტონი და კიმი ანტონელი (მერსედესი) სტარტს შესაბამისად მე-5 და მე-7 პოზიციებიდან აიღებენ.

მეორე მხრივ, მაკლარენმა მაიამის შემდეგ პირველი სერიოზული განახლება წარმოადგინა, რამაც აშკარად გაამართლა. გუნდის შეფი ანდრეა სტელა აცხადებს, რომ პოულ პოზიცია მოლოდინს გადააჭარბა, თუმცა ნორისს სჯერა, რომ მისი ბოლიდის პოტენციალი სრულად ჯერ კიდევ არ გამოვლენილა.

"ვიცოდი, რომ სისწრაფე გვქონდა. თუმცა მხოლოდ ერთ კარგ კვალიფიკაციას ვერ დავეყრდნობი, ხვალ კარგი რბოლა მჭირდება. ფერარიზე ვდებდი ფსონს, მაგრამ კვალიფიკაციაში სერიოზული ნაბიჯი წინ გადავდგით", - აღნიშნა ნორისმა.

პარალელურად, ასტონ მარტინში, სადაც ედრიან ნიუის ახალი განახლება დატესტეს, პოზიტიური ძვრები შეიმჩნევა. ფერნანდო ალონსომ სეზონში პირველად მოახერხა კვალიფიკაციის პირველი სესიის ბარიერის გადალახვა. მიუხედავად მე-16 პოზიციისა, ესპანელი აღნიშნავს, რომ ეს უდიდესი წინგადადგმული ნაბიჯია მთელი ქარხნისთვის. ალონსოს მომავალი ჯერ კიდევ ბურუსითაა მოცული, 45 წლის პილოტი, რომელიც მალე პირველად გახდება მამა, საზაფხულო შესვენებაზე კარიერის გაგრძელების საკითხს სერიოზულად გადახედავს.