ჰანსი ფლიკი: "თამაშის ბედის გადაწყვეტა პირველსავე ტაიმში შეგვეძლო“

ბარსელონას მთავარმა მწვრთნელმა, ჰანსი ფლიკმა, ესპანეთის თასის მეოთხედფინალში ალბასეტესთან მოპოვებული გამარჯვება (2:1) შეაფასა.

გერმანელი სპეციალისტის თქმით, მიუხედავად სრული კონტროლისა, მატჩის ბოლო მონაკვეთი გუნდისთვის საკმაოდ დამღლელი აღმოჩნდა.

ფლიკმა აღნიშნა, რომ კატალონიელებს ბევრი საგოლე მომენტი ჰქონდათ და შეხვედრის ბედის გარკვევა პირველივე ტაიმში იყო შესაძლებელი. თუმცა, გამოუყენებელი შანსების გამო, გუნდს ბოლომდე ბრძოლა დასჭირდა. მწვრთნელმა ხაზი გაუსვა იმ ფაქტსაც, რომ ბარსელონას ძალიან გადატვირთული გრაფიკი აქვს და მატჩების ყოველ სამ დღეში ჩატარება ფეხბურთელებისგან დიდ ენერგიას მოითხოვს.

„ჩვენ თამაშს ვაკონტროლებდით, თუმცა საბოლოოდ გამარჯვებისთვის დიდი ძალისხმევის გაღება მოგვიხდა. გუნდი ყოველთვის მზად არის საბრძოლველად, მიუხედავად იმისა, რომ მოედანზე ყოველ სამ დღეში ერთხელ გავდივართ“, – განაცხადა ფლიკმა მატჩის შემდეგ.

კოპა დელ რეის 1/2 ფინალში ბარსელონას მეტოქე წილისყრის შემდეგ გახდება ცნობილი, ჯერჯერობით 1/4 ფინალური ეტაპი სრულად არც დასრულებულა.