იამალი: "იმედია, მთელ კარიერას ბარსელონაში გავატარებ"

18 წლის ლამინ იამალმა გამოთქვა სურვილი, მთელი საფეხბურთო კარიერა ბარსელონაში გაატაროს.

ახალგაზრდა ვარსკვლავი ესპანური გამოცემა Mundo Deportivo-ს 120 წლის იუბილესადმი მიძღვნილ გალა-კონცერტს დაესწრო.

საკუთარ მომავალთან დაკავშირებულ კითხვაზე იამალმა ერთმნიშვნელოვნად უპასუხა:

„იმედი მაქვს, აქ მთელი ცხოვრება დავრჩები. მინდა ყოველი დღით დავტკბე მსოფლიოს საუკეთესო კლუბსა და საუკეთესო ქალაქში.“

ფეხბურთელმა გუნდის უახლოეს მიზნებზეც ისაუბრა და აღნიშნა, რომ ახლა მთელი კონცენტრაცია ესპანეთის თასზეა მიმართული:

„ჩვენ ესპანეთის თასის ნახევარფინალში გასასვლელად ვიბრძვით. ეს არის ტიტული, რომელიც აუცილებლად უნდა მოვიგოთ,“ — დასძინა იამალმა.

დღეს, 3 თებერვალს, თბილისის დროით 23:59 საათზე ბარსელონა კოპა დელ რეის 1/4 ფინალში ალბასეტეს დაუპირისპირდება.