ბარსელონას ვარსკვლავმა ლამინ იამალმა მედიასთან კიდევ ერთხელ დაადასტურა, რომ კატალონიურ კლუბში მადრიდის ატლეტიკოს ფორვარდის, ხულიან ალვარესის ტრანსფერს მოუთმენლად ელის.
18 წლის ვინგერის აზრით, არგენტინელი თავდამსხმელი იდეალურად მოერგება გუნდის სათამაშო სტილს.
Mundo Deportivo-სთან ინტერვიუში ესპანეთის ნაკრების შემტევმა განაცხადა:
ყველამ იცის, რომ ის ტოპ ფეხბურთელია. ჩვენ მზად ვართ მისი მისაღებად და თუ მოვა, ძალიან ბედნიერები ვიქნებით. ჩემი აზრით, ის საუკეთესო კლუბში, საუკეთესო ფანებთან და საუკეთესო ქალაქში მოვა. მის ადგილას ამ ნაბიჯს აუცილებლად გადავდგამდი
სანამ იამალი არაფორმალური აგენტის როლს ასრულებს, მადრიდში სიტუაცია უკიდურესად დაიძაბა. ხულიან ალვარესის ბარსელონაში გადასვლის საჯარო სურვილმა დიეგო სიმეონეს მოთმინების ფიალა აუვსო. მადრიდის ატლეტიკოს მწვრთნელი, რომელიც ფეხბურთელებისგან სრულ ერთგულებას ითხოვს, მზად არის მსოფლიო ჩემპიონს წასვლის უფლება მისცეს, რათა გასახდელში ატმოსფერო არ გაფუჭდეს.
მიუხედავად ორმხრივი ინტერესისა, ტრანსფერს წინ ბარსელონას ფინანსური პრობლემები ეღობება. კლუბის სპორტული დირექტორი დეკო არგენტინელის დიდი თაყვანისმცემელია, თუმცა ჟოან ლაპორტას მოუწევს ისეთი ფინანსური ფორმულის პოვნა, რომელიც მადრიდელებსაც დააკმაყოფილებს და ლა ლიგის მკაცრ ლიმიტებშიც ჩაჯდება.
