არგენტინის ნაკრების ლეგენდამ, მარიო კემპესმა, ესპანელი სენსაცია ლამინ იამალი გააფრთხილა, რომ ნამდვილი სუპერვარსკვლავის სტატუსის მოსაპოვებლად მას მსოფლიო ჩემპიონატზე დიდი გავლენის მოხდენა სჭირდება.
1978 წლის მუნდიალის გამარჯვებული მიიჩნევს, რომ ლეგენდის სტატუსი მხოლოდ მაშინ მიიღწევა, როცა ფეხბურთელს უდიდეს სცენაზე საკუთარი ქვეყნის წინ გაძღოლა შეუძლია.
FCB World-ის მიერ გავრცელებულ ინტერვიუში კემპესმა აღნიშნა, რომ სანაკრებო ტურნირების წნეხი სრულიად განსხვავდება საკლუბო ფეხბურთისგან:
მან უნდა დაამტკიცოს, რომ სუპერვარსკვლავია. ბარსელონაში მისი ძალა ყველამ უკვე ვნახეთ, მაგრამ ახლა მოდით, ეს მსოფლიო ჩემპიონატზე ვნახოთ. სწორედ აქ ჩანს დიდი ფეხბურთელების ნამდვილი ფასი. მუნდიალი არ არის ისეთივე, როგორც კლუბში თამაში. ჩემპიონთა ლიგის წყალობით ბარსელონას მოთამაშეებს საერთაშორისო დონეზე ვიცნობთ, მაგრამ ეს მსოფლიო თასია, აქ სულ სხვა წნეხია
კემპესმა ასევე დაამატა, რომ მიუხედავად იამალის ლიდერული პოტენციალისა, ლუის დე ლა ფუენტეს გუნდის ნამდვილი გული ამჟამად პედრია, რომელიც თამაშის ტემპს კარნახობს და ბურთს აკონტროლებს.
18 წლის იამალის მუნდიალის სტარტი მარტივი არ ყოფილა, რადგან ის ტურნირს მძიმე ტრავმის შემდეგ დაუბრუნდა და სამწვრთნელო შტაბი მის წუთებს უფრთხილდება. მიუხედავად ამისა, საუდის არაბეთთან გატანილი გოლის შემდეგ, მოლოდინები დიდია. ავსტრიის ნაკრების მწვრთნელმა რალფ რანგნიკმაც კი აღნიშნა, რომ თუ იამალი ჯანმრთელობას შეინარჩუნებს, მას ლიონელ მესის დონის მიღწევა შეუძლია. ესპანეთის ნაკრები პლეი-ოფში ავსტრიასთან მატჩისთვის ემზადება, სადაც იამალს კემპესის გამოწვევაზე პასუხის გაცემის შანსი ექნება.
