იბერიას კაპიტანმა კრიტიკოსებს მწვავედ უპასუხა

ლარნესთან ორმატჩიან დუელში გამარჯვების შემდეგ, იბერია 1999-ის კაპიტანმა, გიორგი ჯინჯოლავამ პრესკონფერენციაზე შეფასებები გააკეთა.

"ვფიქრობ, კრიტიკოსებს კლავიატურა გაუფუჭდათ. სად არის ახლა ეს ხალხი?! როცა იცი, რომ გუნდს უწევს ისეთ პირობებში თამაში, როგორშიც ჩვენ ვითამაშეთ, არ შეიძლება, რომ ასეთი კრიტიკა მოდიოდეს. პირადად ჩემზე ეს არ მოქმედებს, რადგან ვიღაცების აზრი არ მაინტერესებს, მაგრამ ახალგაზრდული გუნდი გვყავს და ბევრზე შეიძლება ცუდად იმოქმედოს. ამას ეს ჩასაფრებული ხალხი ვერ იაზრებს.

კრიტიკა სამართლიანი უნდა იყოს და ყველაფერს თავისი შესაფერისი დრო უნდა ჰქონდეს. როცა გუნდს 0:0 აქვს ნათამაშები და წინ საპასუხო მატჩი ელოდება, ასეთ დროს ზედმეტი საუბარი მიუღებელია.

ხაზს ვუსვამ, რომ ყველამ იცოდა, რა პირობებში და რა გარემოებების ფონზე ვითამაშეთ. შეუძლებელია, რომ სლოვანთან კარგად ითამაშო და ამ გუნდთან ვერ ითამაშო.

ვფიქრობ, დღეს დომინანტურად ვითამაშეთ და ეს კრიტიკოსები გავაჩუმეთ. არ მგონია, ახლა ხმის ამოღების უფლება ჰქონდეთ.

ნამდვილი გულშემატკივრები, ქართული ფეხბურთის გულშემატკივრები არიან ისინი, ვინც დღეს სტადიონზე მოვიდა, მხარი დაგვიჭირა და მათ კიდევ ერთხელ დიდ მადლობას ვუხდი", - თქვა ჯინჯოლავამ.

იბერიელთა კაპიტანმა მიმდინარე ევროტურნირებზე მე-3 ყვითელი ბარათი მიიღო და დისკვალიფიკაციასთან ერთ ნაბიჯშია. უეფა-ს ახალი წესდების მიხედვით, ფეხბურთელი 1-მატჩიან დისკვალიფიკაციას 4 გაფრთხილების შემდეგ იღებს.

27 აგვისტოს გაირკვევა, იბერიელები ევროპა ლიგის ლიგის ფაზაში ითამაშებენ თუ კონფერენს ლიგის ლიგის ფაზაში.

ევროპა ლიგის საკვალიფიკაციო ეტაპის პლეი-ოფში ანდრი დემჩენკოს გუნდი შოტლანდიურ რეინჯერსსა და პოლონურ იაგელონიას წყვილში გამარჯვებულს შეხვდება. პირველი თამაში სტუმრად 20 აგვისტოსაა, მეორე - 27 აგვისტოს შინ.

"ეს თუ არ გამოსწორდა, გაგვიჭირდება" - დემჩენკომ პრობლემაზე ღიად ისაუბრა