UFC-ს პრეზიდენტი, დანა უაითი, ორგანიზაციასთან არსებული საჯარო დაპირისპირების მიუხედავად, ჯონ ჯონსის მისამართით ქების სიტყვებს არ იშურებს და მას სპორტის ისტორიაში უდიდეს ფიგურად მიიჩნევს. მძიმე და ქვემძიმე წონის ყოფილმა ჩემპიონმა ოქტაგონზე თავისი ლეგენდარული კარიერა, როგორც ჩანს, დაასრულა, თუმცა არა საკუთარი ნებით.
კონფლიქტი მას შემდეგ დაიწყო, რაც უაითმა ჯონსს თეთრ სახლში დაგეგმილ ღონისძიებაზე ჩხუბის უფლება არ მისცა და მას არასაიმედო უწოდა. ამას მოჰყვა საჯარო კამათი მოლაპარაკებების პირობებზე - ჯონსმა ორგანიზაცია დაბალი ფინანსური შეთავაზების გამო გააკრიტიკა და კონტრაქტის გაუქმება მოითხოვა, რის გამოც იურისტების დახმარებასაც კი მიმართა, რათა UFC-სთან ვალდებულებებს თავი დააღწიოს.
მიუხედავად ასეთი მტრული ფონისა, The New Yorker-თან ინტერვიუში დანა უაითმა ხაზი გაუსვა, რომ ჯონსის მიღწევებს სპორტში ვერაფერი დააკნინებს:
თუ თქვენ ეძებთ თქვენს მაიკლ ჯორდანს, ეს სწორედ ჯონ ჯონსია, რომელიც უდიდესია ამ სპორტში. ის უკვე ორმოც წელსაა გადაცილებული, კვლავ დაუმარცხებელია, არასდროს წაუგია და სხვადასხვა წონით კატეგორიებში გადადიოდა. UFC-ში დაუმარცხებელი დარჩენა ძალიან უნიკალური რამაა და რთული მისაღწევია.
სანამ UFC-სთან კონტრაქტის გაწყვეტის პროცესი მიმდინარეობს, ჯონ ჯონსი კარიერის გაგრძელების ალტერნატიულ გზებს ეძებს. ის მიზნად ისახავს ფრენსის ნგანუსთან დიდი ხნის ნანატრ ორთაბრძოლას ორგანიზაციის ფარგლებს გარეთ და ასევე აანონსებს ძალების მოსინჯვას კრივში. კერძოდ, ჯონსმა აღნიშნა, რომ გეგმავს მოლაპარაკებებს IBA-ს პრეზიდენტ უმარ კრემლევთან რუსეთში, რათა რინგზე გასვლის ვარიანტები განიხილოს, როგორც კი მიმდინარე კონტრაქტისგან გათავისუფლდება.
