4 ივნისს დაგეგმილ ტურნირს, სახელწოდებით UFC Freedom 250, საფეხბურთო და სპორტულ სამყაროში დიდი აჟიოტაჟი მოჰყვა, თუმცა ყველა აღფრთოვანებული არ არის.
დანა უაითი გულშემატკივრებს ჰპირდება, რომ ეს ორგანიზაციის ისტორიაში ყველაზე გრანდიოზული შოუ იქნება, რადგან 7-ბრძოლიანი საღამო თეთრი სახლის ეზოში გაიმართება, სადაც მას მსოფლიო ლიდერები, ვიპ-სტუმრები და სამხედროები დაესწრებიან. გავლენიან პირებს ბილეთების პაკეტს 1.5 მილიონ დოლარადაც კი სთავაზობენ.
UFC-ის ყოფილმა ჩემპიონმა მსუბუქ წონაში, ბენსონ ჰენდერსონმა, რომელიც თავად 42 წლის ასაკში PFL-ის ეგიდით ბრუნდება სპორტში, ტურნირის იდეა მკაცრად გააკრიტიკა და მას „მასხარაობა“ უწოდა.
„ამას ნამდვილად არ ვუყურებ. ვფიქრობ, ჩემი ქვეყნის თეთრი სახლი საგამოფენო და საცირკო მოედნად არ უნდა იქცეს. თუ ცირკი და შოუები გიყვარს, კარგია, მაგრამ ასეთი გასართობი ღონისძიებები შესაბამის ლოკაციებზე უნდა ტარდებოდეს. ჩვენი ქვეყნის უმაღლესი რეზიდენცია ამისთვის განკუთვნილი არ არის და ეს მამწუხრებს“, - განაცხადა ჰენდერსონმა talkSPORT-თან ინტერვიუში.
მებრძოლმა დაამატა, რომ ის ამაყობს თავისი წვლილით შერეული ორთაბრძოლების ლეგალიზაციასა და განვითარებაში, თუმცა თეთრ სახლში მსგავსი სანახაობის მოწყობა უპატივცემულობაა როგორც თავად სახელმწიფო შენობის, ისე ზოგადად MMA-ის მიმართ.
