ისტორიაში ყველაზე ახალგაზრდა - ანტონელიმ მონაკოს გრან პრი მოიგო

კიმი ანტონელიმ მონაკოს გრან-პრიზე გვიან ეტაპზე განვითარებულ დრამას თავი წარმატებით აარიდა და მრბოლელთა ჩემპიონატის ლიდერობა კიდევ უფრო განიმტკიცა.

მან ლუის ჰამილტონსა და ისაკ ჰაჯარს ამაღელვებელ რბოლაში აჯობა, რომელშიც შვიდმა მრბოლელმა ვერ დაასრულა დისტანცია.

სტარტზე მერსედესის პილოტმა მშვიდად შეინარჩუნა პირველი პოზიცია, მაშინ როდესაც რედ ბულის მაქს ვერსტაპენს დასაწყისშივე სერიოზული პრობლემა შეექმნა, რის გამოც ის პოზიციებს კარგავდა და საბოლოოდ პირველი გახდა, ვინც რბოლას გამოეთიშა.

სანამ სხვა მრბოლელები სხვადასხვა მექანიკურ პრობლემას ებრძოდნენ და რბოლას ეთიშებოდნენ, მათ შორის ვალტერი ბოტასი და მაკლარენის ლანდო ნორისი, ანტონელი სტაბილურად ზრდიდა უპირატესობას ფერარის პილოტების, ლუის ჰამილტონისა და შარლ ლეკლერის მიმართ.

თუმცა, გამარჯვება დაახლოებით 20 წრით ადრე საფრთხის ქვეშ აღმოჩნდა, როდესაც ლენს სტროლი მონაკოს ტრასის ბოლო მოსახვევში ავარიაში მოყვა.

ამის შედეგად ტრასაზე უსაფრთხოების მანქანა გამოვიდა, რამაც ბევრ გუნდს საშუალება მისცა მეორე პიტ-სტოპი დიდი დროის დაკარგვის გარეშე შეესრულებინა.

ეს ანტონელის ლიდერობას საფრთხეს უქმნიდა, თუმცა შესანიშნავი შესაძლებლობა მისცა იმ მრბოლელებს, რომლებსაც პიტ-ლეინში სიჩქარის გადაჭარბებისთვის დროითი ჯარიმები ჰქონდათ მიღებული, ჯარიმები სწორედ რბოლის მიმდინარეობისას მოეხადათ.

რბოლის განახლება ხანმოკლე აღმოჩნდა, რადგან ადგილობრივი ფავორიტი შარლ ლეკლერი სტროლის იდენტურ ავარიაში მოყვა. ამის შემდეგ ღონისძიება შეჩერდა, რათა ტრასის საფარის დაზიანება შეემოწმებინათ.

ლეკლერის გამოთიშვამ ისაკ ჰაჯარს კარიერაში პირველი პოდიუმი მოუტანა რედ ბულის შემადგენლობაში. პიერ გასლიმ ფინიშის ხაზი უფრო მაღალ პოზიციაზე გადაკვეთა, თუმცა ორი 5-წამიანი ჯარიმის გამო კლასიფიკაციაში უკან ჩამოქვეითდა.

ოსკარ პიასტრიმ და ლიამ ლოუსონმა შესაბამისად მე-4 და მე-5 ადგილები დაიკავეს.

არვიდ ლინდბლადმაც შესანიშნავი შედეგი აჩვენა რეისინგ ბულსისთვის და მე-6 ადგილი დაიკავა. მას მოჰყვნენ პიერ გასლი (მე-7), ალექს ალბონი (მე-8) და ესტებან ოკონი (მე-9). 

კადილაკს თავდაპირველად ეგონა, რომ სერხიო პერესის წყალობით სეზონში პირველი ქულა მოიპოვა, მაგრამ მოგვიანებით პერესი წითელი დროშის შემდეგ ფალსტარტისთვის დაჯარიმდა და 10-წამიანი ჯარიმა მიიღო, რის შედეგადაც ბოლო ადგილზე ჩამოქვეითდა.

ამის გამო ასტონ მარტინმა სეზონში პირველი ტოპ-10 შედეგი იზეიმა ფერნანდო ალონსოს დახმარებით.

19 წლის კიმი ანტონელიმ ზედიზედ მე-5 რბოლა მოიგო და ისტორიაში ყველაზე ახალგაზრდა მრბოლელი გახდა, რომელმაც მონაკოს გრან პრიზე გამარჯვება მოიპოვა. წინა რეკორდი ლუის ჰამილტონს ეკუთვნოდა, რომელმაც მონაკოში რბოლა 23 წლის ასაკში მოიგო.

კიმი ანტონელი ასევე გახდა ისტორიაში მე-3 იტალიელი მრბოლელი, რომელიც მონაკოს გრან პრის გამარჯვებული გახდა. ამასთან ის ყველაზე ახალგაზრდა პილოტია, რომელმაც გრანდ სლემი შეასრულა (პოული, ყველა წრეზე ლიდერობა, უსწრაფესი წრე, გამარჯვება).

19 წლის იტალიელი მრბოლელთა საჩემპიონო დავას უკვე 66-ქულიანი უპირატესობით ლიდერობს.

1. ანტონელი - 156 ქულა

2. ჰამილტონი - 90 ქულა

3. რასელი - 88 ქულა

4. ლეკლერი - 75 ქულა

5. პიასტრი - 60 ქულა