მანჩესტერ იუნაიტედი კაზემიროს შემცვლელს აქტიურად ეძებს და გავრცელებული ინფორმაციით, კლუბმა ატალანტას 26 წლის ნახევარმცველთან, ედერსონთან, უკვე მიაღწია შეთანხმებას.
ბრაზილიელმა ნახევარმცველმა იუნაიტედში გადასვლაზე მწვანე შუქი აანთო. მიუხედავად იმისა, რომ მისით მადრიდის ატლეტიკოც იყო დაინტერესებული, ინგლისურმა კლუბმა რბოლაში დაწინაურება შეძლო. ახლა მოლაპარაკებები კლუბებს შორის უნდა გაგრძელდეს. იტალიური მხარე ფეხბურთელის სანაცვლოდ 45 მილიონს ითხოვს.
34 წლის კაზემირომ დაადასტურა, რომ სეზონის ბოლოს გუნდს ტოვებს. ედერსონი კი ბევრი თვისებით სწორედ კაზემიროს მოგვაგონებს.
დაცვითი უნარების თვალსაზრისით, ედერსონს მიმდინარე სეზონში უკვე 128 ბურთის დაბრუნება (recovery) აქვს. კაზემიროს მსგავსად, ედერსონიც სახიფათოა შეტევაში. მან ატალანტას მაისურით ჩატარებულ 179 მატჩში 16 გოლი გაიტანა (მათ შორის ერთი გასულ კვირას მილანთან).
ფაბიო კაპელომ მას „სხვა პლანეტის მოთამაშე“ უწოდა, ბევრი ექსპერტი კი მას მსოფლიოში ერთ-ერთ უძლიერეს ჩამშლელ ნახევარმცველად მიიჩნევს.
