ჯენარო გატუზო იტალიის ნაკრებში დანიშვნასთან ერთ ნაბიჯშია

როგორც ჩანს, იტალიის ნაკრების მთავარი მწვრთნელი ჯენარო გატუზო გახდება.

რამდენიმე დღის წინ ლუჩანო სპალეტიმ თანამდებობა არადამაკმაყოფილებელი შედეგების გამო დატოვა და იტალიის ფეხბურთის ფედერაცია მწვრთნელის ძიებას შეუდგა.

თავიდანვე დაიწერა, რომ ფედერაციას სურს, 2006 წლის მსოფლიო ჩემპიონი ნაკრების ერთ-ერთი წევრი დანიშნოს მწვრთნელად და გატუზოს გარდა, დანიელე დე როსის ვარიანტიც განიხილებოდა.

თუმცა, ჟურნალისტი მატეო მორეტო იტყობინება, რომ დღეს გატუზოსა და იტალიის ფეხბურთის ფედერაციას შორის საკმაოდ დადებითი შეხვედრა გაიმართა, რამაც იტალიელი ნაკრებში დანიშვნას მიუახლოვა.

ამ ეტაპზე, იტალიის ნაკრებში დანიშვნის მთავარ ფავორიტად სწორედ რინო მოიაზრება, რომელიც რამდენიმე კვირის წინ ხორვატული ჰაიდუკიდან დაითხოვეს.

შეგახსენებთ, რომ იტალიას ბოლო ორი მსოფლიო ჩემპიონატი აქვს გამოტოვებული და გატუზოს მთავარი ამოცანაც, დანიშვნის შემთხვევაში, ნაკრების მუნდიალზე გაყვანა იქნება.