"კარკაძე და მატკავა გუნდისთვის უდიდესი ძალაა" - ქართველებმა ფრანგულ კლუბთან კონტრაქტი გაახანგრძლივეს

ვანო კარკაძემ და ლუკა მატკავამ საფრანგეთის სარაგბო ჩემპიონატის მეორე დივიზიონის (Pro D2) ოიონასთან კონტრაქტი ორი წლით გაახანგრძლივეს.

ახალი ხელშეკრულების თანახმად, ქართველი მორაგბეები კლუბის ღირსებას 2029 წლამდე დაიცავენ.

კარკაძე და მატკავა ფრანგულ გუნდს 2025 წელს შეუერთდნენ, სადაც მათთან ერთად საქართველოს ნაკრების კიდევ ერთი წევრი, ვასილ ლობჟანიძეც თამაშობს.

ქართველი მოთამაშეების პროგრესითა და კონტრაქტის გახანგრძლივებით კმაყოფილია ოიონას სპორტული მენეჯერი, ფაბიენ სიბრე:

კარკაძე და მატკავა გუნდისთვის უდიდესი ძალაა და მოხარულები ვართ მათთან ახალი ხელშეკრულების გაფორმებით. კარკაძე გუნდს ადვილად შეეწყო და TOP 14-სა და საერთაშორისო დონეზე დაგროვებულ გამოცდილებას ახლა ჩვენი გუნდის სასარგებლოდ იყენებს.

მენეჯერმა განსაკუთრებული ყურადღება დაუთმო ლუკა მატკავას თამაშსაც:

ასევე ძალიან კმაყოფილი ვარ ამ სეზონში ლუკა მატკავას თამაშით. თავიდანვე გვჯეროდა მისი და გვინდოდა, ადაპტაციისთვის საკმარისი დრო მიგვეცა. მიმდინარე სეზონში მატკავა აჩვენებს თავის ნიჭს შეტევების ორგანიზებაში და სიზუსტეს.

მიმდინარე სეზონში ვანო კარკაძემ ოიონას შემადგენლობაში 2 ლელო მიითვალა, ხოლო ლუკა მატკავას ანგარიშზე 4 ლელო, 30 გარდასახვა და 13 ზუსტად შესრულებული საჯარიმოა, რითაც ჯამში 119 ქულა დააგროვა.