ხანძრიდან ერთი თვის შემდეგ - მეცის ფეხბურთელი თავის პარტნიორს შეხვდა

კრანს-მონტანას ხანძრის გმირი თავის პარტნიორს კვლავ შეხვდა.

მეცის ფეხბურთელმა ტაჰირის დოს სანტოსმა, შვეიცარიაში 1 იანვარს მომხდარი ხანძრიდან 1 თვის გასვლის შემდეგ, საბოლოოდ შეძლო პარტნიორ კოლინთან კვლავ შეხვედრა. ორივეს სხეულის დაახლოებით 30% აქვს დამწვარი. კოლინმა კი თითქმის სამი კვირა კომაში გაატარა.

ტრაგედიის დროს ტაჰირისმა მისი ცეცხლიდან გამოყვანა მოახერხა. დღეს ისინი კვლავ ერთად არიან და ერთად იწყებენ ხანგრძლივ რეაბილიტაციის პროცესს.

ფეხბურთელის სპორტული მომავალი ჯერ კიდევ გაურკვეველია, თუმცა წყვილი ახლა ყურადღებას ცხოვრების თავიდან აწყობაზე და ერთმანეთის გვერდით ყოფნაზე ამახვილებს.

ახალი წლის ღამეს, მეცის 19 წლის ფეხბურთელი თავის შეყვარებულთან ერთად კრანს-მონტანას ერთ-ერთ ბარში იმყოფებოდა, სადაც ხანძარი გაჩნდა და სულ მცირე 40 ადამიანი დაიღუპა.

ხანძრის დროს ტაჰირისი ბარის პირველ სართულზე იყო. მან მოახერხა ჯოჯოხეთიდან თავის დაღწევა, თუმცა მალევე მიხვდა, რომ მისი შეყვარებული შიგნით დარჩა. ის უკან დაბრუნდა, რათა კოლინი ცეცხლიდან გამოეყვანა.

ახლა ისინი კვლავ შეხვდნენ ერთმანეთს, მას შემდეგ რაც სამ კვირაზე მეტი დრო განცალკევებულები იყვნენ.

„როცა დავინახე, ისეთი შეგრძნება მქონდა, თითქოს დიდი ტვირთი მომეხსნა.“ - განაცხადა ტაჰირისმა.