კილიან მბაპეს ემოციური გზავნილი მადრიდელებს

ჩემპიონთა ლიგაზე ბაიერნ მიუნხენთან გამოთიშვის შემდეგ, კილიან მბაპემ რეალ მადრიდის გულშემატკივრებს მიმართა.

ფრანგმა ფორვარდმა აღიარა მარცხით გამოწვეული ტკივილი, თუმცა ხაზი გაუსვა, რომ გუნდმა პასუხისმგებლობა უნდა აიღოს და რეაგირება მოახდინოს. მან ფანებს პირობა მისცა, რომ წარმატება სანტიაგო ბერნაბეუზე მალე დაბრუნდება.

ოცნება მიუნხენში დასრულდა

მბაპეს იმედი, რომ რეალ მადრიდთან ერთად ჩემპიონთა ლიგის თასს აღმართავდა, გერმანიაში განცდილი დრამატული მარცხით დასრულდა. ქაოსურ საპასუხო შეხვედრაში ესპანურმა გრანდმა ორი მატჩის ჯამში 4:6 წააგო. მიუხედავად იმისა, რომ მადრიდელებმა სტუმრად სამი გოლი გაიტანეს, ეს საკმარისი არ აღმოჩნდა ტურნირის ისტორიაში ყველაზე წარმატებული კლუბისთვის.

თვითკრიტიკა და მომავლის იმედი

მატჩის შემდეგ მბაპემ, რომელმაც ბაიერნთან ორივე შეხვედრაში გაიტანა, სოციალურ ქსელში პოსტი გამოაქვეყნა. ფრანგმა უარი თქვა ინდივიდუალურ მიღწევებზე საუბარზე და აქცენტი გუნდურ პასუხისმგებლობაზე გააკეთა.

ბოლომდე ვცდილობდით, მაგრამ ეს საკმარისი არ აღმოჩნდა. ასეთი მნიშვნელოვანი ტურნირიდან გამოთიშვა იმედგაცრუებაა, თუმცა წინ უნდა ვიყუროთ. საკუთარ თავებში კარგად უნდა ჩავიხედოთ, რომ მსგავსი იმედგაცრუება აღარ განმეორდეს. ჩვენ არასდროს დავნებდებით! მადრიდში მარცხი არასდროს ყოფილა და არც იქნება არჩევანი. ერთ რამეს გპირდებით: ჩვენ ისევ დავიწყებთ მოგებას და ეს ძალიან მალე მოხდება

არბელოას მხარდაჭერა

მბაპეს პოზიცია გუნდის მწვრთნელმა, ალვარო არბელოამაც გაიზიარა. მან აღნიშნა, რომ ამაყობს ფეხბურთელებითა და გულშემატკივრებით, რომლებმაც გუნდს მიუნხენშიც დაუჭირეს მხარი.

„თუ რამე მტკივა ამ მარცხში, ეს არის ის, რომ წელს მე-16 ტიტულს ვერ მოვიგებთ და განსაკუთრებით ის ფორმა, როგორადაც ეს მოხდა. ფანები უნდა ამაყობდნენ თავიანთი ფეხბურთელებით, რადგან მათ მოედანზე ყველაფერი დატოვეს. სეზონის ბოლომდე დარჩენილ მატჩებში ჩვენ ამ ემბლემას მაქსიმალურად დავიცავთ“, - განაცხადა არბელოამ კლუბის ოფიციალურ საიტზე.