კვარა და ბაფანა ბაფანა - საიდან მოდის ხვიჩას სამხრეთ აფრიკელობის ამბავი?

სამხრეთ აფრიკის სპორტის მინისტრმა გეიტონ მაკენზიმ და ბაფანა ბაფანამ რეაგირება მოახდინეს ვირუსულ ვიდეოზე, რომელშიც ხვიჩა კვარაცხელია ამტკიცებს, თითქოს მას სამხრეთ აფრიკული ფესვები აქვს, რაც უფლებას აძლევს, ქვეყნის სახელით მსოფლიო ჩემპიონატზე ითამაშოს.

Soccer Beat-თან საუბარში, სპორტის მინისტრმა გეიტონ მაკენზიმ უპასუხა ბრალდებებს, რომ ქართველი ფეხბურთელი კვარაცხელია თითქოს თავისი წარმომავლობით სამხრეთ აფრიკაში თამაშის უფლებას მოიპოვებდა.

„ჩვენ ეს არ გვინდა, ჩვენს მოთამაშეებს უნდა ვენდოთ. იმ ხალხთან ერთად უნდა წავიდეთ, ვინც ჩვენ იქამდე მიგვიყვანა.“ - განაცხადა მინისტრმა.

განსხვავებით მაკენზისგან, სამხრეთ აფრიკის ეროვნული ნაკრები უფრო ხალისით მიუდგა კვარაცხელიას „დამატების“ იდეას.

თავიანთ ოფიციალურ TikTok ანგარიშზე, ბაფანა ბაფანამ გამოაქვეყნა ვიდეო, რომელშიც ქართველი ფეხბურთელი ჩანს, ეკრანზე კი სამხრეთ აფრიკის დროშის ემოჯებია დამატებული. ვიდეოს ფონად კურტ დარენის ჰიტი „Kaptein“ აქვს.

გვერდის ადმინმა ხუმრობით იკითხა, თითქოს კვარაცხელიას გუნდის წევრობა სურდა: „რა არის მისი სამხრეთაფრიკული სახელი?“

სხვა ვიდეოში, რომელიც ასევე TikTok-ზე აიტვირთა, ჩანს AI-ის მიერ გენერირებული კვარაცხელია, რომელიც პრესკონფერენციაზე საუბრობს, სამხრეთ აფრიკის დროშა კი მხრებზე აქვს შემოხვეული.

„მიყვარს სამხრეთ აფრიკა. მზად ვარ, ვითამაშო ჩემი ქვეყნის სახელით 2026 წლის ფიფას მსოფლიო ჩემპიონატზე. საქართველოში საქმე დავამთავრე.“ - ამბობს კვარა ვიდეოში.

სხვა კადრში ქართველი ფეხბურთელი ბაფანა ბაფანას მიმართავს:

„თუ სამხრეთ აფრიკა მიმიწვევს, იქ ვიქნები. ჩემი ბებია სამხრეთაფრიკელია, ეს ჩემი იდენტობის ნაწილია.“ - აღნიშნული სტატია სამხრეთ აფრიკულ პრესაში გავრცელდა.

კვარაცხელიას შესაძლო სამხრეთაფრიკელობა ადგილობრივ მოსახლეობაში ვირუსულად გავრცელდა, რასაც ქართველი ფეხბურთელის ბოლო პოსტებზე მათი უამრავი კომენტარი მოჰყვა, სადაც ხვიჩას თავიანთ გუნდში გადასვლას მიესალმებიან.