ლეგენდარული არგენტინელი კარიერის დასასრულს უახლოვდება

ლიდს იუნაიტედის ლეგენდარულმა მწვრთნელმა, მარსელო ბიელსამ საჯაროდ მიანიშნა, რომ მისი ერა ურუგვაის ნაკრებში დასასრულს უახლოვდება.

70 წლის არგენტინელმა სპეციალისტმა განაცხადა, რომ ეროვნულ გუნდთან ერთად მუშაობას 2026 წლის ჩრდილოეთ ამერიკის მსოფლიო ჩემპიონატის დასრულებისთანავე შეწყვეტს.

ბიელსა ურუგვაის სათავეში 2023 წლის მაისში ჩაუდგა. მის მიერ დანერგილმა მაღალი ინტენსივობის სათამაშო სტილმა გუნდს 2024 წლის კოპა ამერიკაზე მესამე ადგილი მოუტანა. მიუხედავად წარმატებისა, მწვრთნელმა დაადასტურა, რომ მისი მოგზაურობა ფინალურ ეტაპზეა:

ჩვენი სამუშაო მსოფლიო ჩემპიონატთან ერთად სრულდება. ნებისმიერი პროფესიონალისთვის მუნდიალზე მონაწილეობა სასწაულია და მადლობელი ვარ ურუგვაის, რომ ამ ტურნირით ტკბობის შესაძლებლობა მომცა

ბიელსას მუშაობა ურუგვაიში ტაქტიკურ ბრწყინვალებასთან ერთად, ტრადიციული შიდა უთანხმოებებითაც გამოირჩეოდა. გუნდის ლეგენდარული თავდამსხმელი, ლუის სუარესი წარსულში საჯაროდ აკრიტიკებდა მწვრთნელის მკაცრ რეჟიმსა და მართვის სტილს. მიუხედავად ამისა, ფანები გუნდის თამაშით კმაყოფილები არიან და 2026 წლის მუნდიალზე, სადაც ურუგვაი ჯგუფში ესპანეთთან, კაბო-ვერდესა და საუდის არაბეთთან ერთად არის, დიდ იმედებს ამყარებენ. ადგილობრივი მედიაც ადასტურებს, რომ ტურნირის შემდეგ ბიელსა პოსტს ნამდვილად დატოვებს.

ლეგენდარული მწვრთნელისთვის, რომელმაც ლიდს იუნაიტედი 2020 წელს პრემიერ ლიგაში დააბრუნა, ეს მუნდიალი კარიერაში ბოლო დიდი გამოწვევა იქნება. ბიელსას მსოფლიო ჩემპიონატზე მუშაობის გამოცდილება უკვე აქვს არგენტინისა (2002 წელს) და ჩილეს ნაკრებებში, ახლა კი სურს ურუგვაისთან ერთად დადებითი წერტილი დასვას.