ჰარი მაგუაირის ოჯახმა ინგლისის ნაკრების მთავარი მწვრთნელი, თომას ტუხელი გააკრიტიკა მას შემდეგ, რაც მანჩესტერ იუნაიტედის მცველი 2026 წლის მსოფლიო ჩემპიონატის მიღმა დატოვა.
33 წლის ვეტერანი ცენტრალური მცველის ნაკრებიდან მოკვეთა ერთ-ერთი ყველაზე დიდი სიურპრიზი აღმოჩნდა ფილ ფოდენისა და კოულ პალმერის არყოფნასთან ერთად.
მაგუაირის მეუღლემ, ფერნმა და დედამ, ზოიმ სოციალურ ქსელში მომხდარს „სირცხვილი“ უწოდეს და აღნიშნეს, რომ ფეხბურთელმა თავისი კლასის დასამტკიცებლად ყველაფერი გააკეთა, თუმცა საბოლოოდ ერთ ადამიანის აზრს შეეწირა.
თავად ფეხბურთელმაც გაავრცელა ემოციური განცხადება: „დარწმუნებული ვიყავი, რომ ამ სეზონის შემდეგ ჩემი ქვეყნისთვის დიდი სარგებლის მოტანა შემეძლო. შოკირებული და განადგურებული ვარ ამ გადაწყვეტილებით“. მაგუაირის ძმებმა კი ტუხელის ნაბიჯს „სრული ქაოსი“ და „ცხოვრებაში ნანახი ყველაზე ცუდი გადაწყვეტილება“ უწოდეს.
ვეტერან მცველს მხარი იუნაიტედის ლეგენდამ, როი კინმაც დაუჭირა, რომელმაც ტუხელის ლოგიკა ეჭვქვეშ დააყენა:
რაზე ფიქრობს საერთოდ თომას ტუხელი? ეს აბსოლუტური ხუმრობა და ცირკია. ჩვენ ვსაუბრობთ ჰარი მაგუაირზე - ნამდვილ, ძველი სკოლის მცველზე, რომელიც წლების განმავლობაში ინგლისისთვის ყოველთვის ბოლომდე იბრძოდა
ტუხელმა კრიტიკას მშვიდად უპასუხა და აღნიშნა, რომ გაკვირვებული იყო მაგუაირის საჯარო განცხადებით:
ჩვენ პირადი საუბარი გვქონდა, სადაც მას თავისი გრძნობების გამოხატვის შანსი მიეცა. ჩემი გადაწყვეტილება კი იმაში მდგომარეობს, რომ ვენდე იმ ცენტრალურ მცველებს, რომლებმაც შემოდგომაზე ნაკრები წინ წასწიეს
17 ივნისს ინგლისი ხორვატიას უპირისპირდება და სწორედ მუნდიალი აჩვენებს, გაამართლებს თუ არა გერმანელი სპეციალისტის ეს რისკიანი ნაბიჯი.
