ლევანდოვსკი ბარსელონას საბოლოოდ ემშვიდობება

რობერტ ლევანდოვსკი ბარსელონაში თავის ოთხწლიან კარიერას ასრულებს.

2022 წლიდან დღემდე პოლონელმა ფორვარდმა კატალონიურ კლუბში დაახლოებით 120 გოლი გაიტანა, თუმცა 38 წლის თავდამსხმელი ზაფხულში ახალ გამოწვევას ეძებს.

BBC-ის ჟურნალისტ გილემ ბალაგეს ინფორმაციით, კლუბი მზად იყო პოლონელთან თანამშრომლობა კიდევ ერთი წლით გაეგრძელებინა, თუმცა ხელფასის მნიშვნელოვანი შემცირებისა და გუნდში როლის შესუსტების პირობით, რაზეც ფეხბურთელმა უარი თქვა.

ლევანდოვსკის ხელში ჩასაგდებად იტალიური გრანდები, იუვენტუსი და მილანი იბრძვიან. ორივე კლუბი მზად არის ვეტერან ფორვარდს ის წამყვანი როლი შესთავაზოს, რასაც ის კვლავ ითხოვს. მიუხედავად MLS-ის ჩიკაგო ფაიერის ინტერესისა, ლევანდოვსკი კარიერის გაგრძელებას ისევ ევროპაში ამჯობინებს.

რაც შეეხება მის შემცვლელს, ბარსელონას პრიორიტეტი ხულიან ალვარესია. ატლეტიკო არგენტინელს 120 მილიონ ევროდ აფასებს, რაც კატალონიელებისთვის ფინანსურად რთული მისაღწევი იქნება. კლუბს ბიუჯეტის დაბალანსება მოუწევს, რათა მსოფლიო დონის ვარსკვლავის ტრანსფერი განახორციელოს.