მესიზე უკეთესი შედეგი? - იამალმა ისტორია დაწერა

ბარსელონას 18 წლის ვარსკვლავმა, ლამინ იამალმა, ლა ლიგაში უპრეცედენტო შედეგი დააფიქსირა.

ის გახდა პირველი ფეხბურთელი ამ ჯილდოს ისტორიაში (2013/14 წლების სეზონიდან), რომელმაც ერთი სეზონის განმავლობაში თვის საუკეთესო მოთამაშის წოდება სამჯერ მოიპოვა.

იამალი საუკეთესოდ გასული წლის ნოემბერსა და დეკემბერში აღიარეს, აპრილში კი მან მესამე ტიტული მიიღო. შედარებისთვის, ლიონელ მესის, კარიმ ბენზემასა და ანტუან გრიზმანს ეს ჯილდო ერთ სეზონში მაქსიმუმ ორჯერ აქვთ აღებული.

აპრილში იამალმა 2 გოლი გაიტანა და 2 საგოლე გადაცემა შეასრულა, მათ შორის გამორჩეული იყო მისი თამაში ატლეტიკოს წინააღმდეგ (2:1).

მიუხედავად ტრიუმფისა, სეზონის დასასრული ფეხბურთელისთვის მძიმე აღმოჩნდა. 22 აპრილს, სელტასთან მატჩისას მიღებული ტრავმის გამო, იამალი ბარსელონას მიმდინარე სეზონში ვეღარ დაეხმარება. თუმცა, მოსალოდნელია, რომ ის სრულად გამოჯანმრთელდება 2026 წლის მსოფლიო ჩემპიონატისთვის, სადაც ესპანეთის ნაკრების ღირსებას დაიცავს.