ლევერკუზენი მწვრთნელის გარეშე რჩება?

ლევერკუზენის ბაიერნს ახალი მთავარი მწვრთნელის ძებნის პროცესი, შესაძლოა, ნამდვილ კრახად შემოუტრიალდეს.

მიუხედავად იმისა, რომ კლუბს კასპერ ჰიულმანდის წასვლა ოფიციალურად ჯერ არ დაუდასტურებია, გერმანიაში ყველამ იცის, რომ დანიელი სპეციალისტი პოსტს დატოვებს. თუმცა, ფარმაცევტებმა შესაძლოა სამივე მთავარი კანდიდატი დაკარგონ.

პირველი, ვინც გერმანელებს უარი უთხრა, ფილიპე ლუისი იყო - ფლამენგოსთან ერთად ტიტულების მომგები ბრაზილიელი მწვრთნელი ლევერკუზენელთა ფავორიტი გახლდათ, თუმცა მან მონაკო ამჯობინა. ამის შემდეგ კლუბი ანდონი ირაოლასა (ბორნმუთი) და ოლივერ გლასნერზე (კრისტალ პალასი) გადაერთო. კლუბის ხელმძღვანელები - სიმონ როლფესი და ფერნანდო კარო ირაოლასთან შეთანხმებასთან ახლოს იყვნენ, თუმცა ვითარება მოულოდნელად შეიცვალა.

ფაბრიციო რომანოს ინფორმაციით, ირაოლა მოულოდნელად ლივერპულის მთავარი სამიზნე გახდა, სადაც მან შაბათს გათავისუფლებული არნე სლოტი უნდა შეცვალოს. მერსისაიდელებთან ბრძოლაში კი ლევერკუზენს შანსები მინიმალური აქვს.

რაც შეეხება ოლივერ გლასნერს, რომელმაც ოთხშაბათს კრისტალ პალასს კონფერენს ლიგა მოაგებინა (ფინალში რაიო ვალეკანო 1:0 დაამარცხეს), ის მილანში მიემგზავრება მოლაპარაკებებზე. იტალიურ გრანდში მასშტაბური ცვლილებებია: გუნდიდან წავიდნენ დირექტორები ჯორჯო ფურლანი, იგლი ტარე, ჯოფრი მონკადა და მთავარი მწვრთნელი მასიმილიანო ალეგრი. მილანელებს სპორტულ დირექტორად რალფ რანგნიკის მოყვანა სურთ, რაც გლასნერის იტალიაში გადასვლის შანსებს კიდევ უფრო ზრდის.

ამგვარად, ლევერკუზენის ბაიერნს, რომელმაც ერიკ ტენ ჰაგის წასვლისა და ჰიულმანდის ხელში ჩემპიონთა ლიგის საგზურის დაკარგვის შემდეგ ახალი დასაწყისი დაგეგმა, მწვრთნელის ძებნა, სავარაუდოდ, ნულიდან მოუწევს.