საფეხბურთო ტრანსფერების ექსპერტის, ეკრემ კონურის ინფორმაციით, ფროზინონეს ქართველი გარემარბი, გიორგი კვერნაძე ევროპული გრანდებისა და წამყვანი კლუბების მთავარ სამიზნეს წარმოადგენს.
ფეხბურთელის გარშემო ვითარება დღევანდელი მდგომარეობით ასე გამოიყურება - დორტმუნდი ქართველ შემტევს აქტიურად აკვირდება, რომასთან უკვე გაიმართა წინასწარი მოლაპარაკება, ხოლო ინგლისურმა ჰალ სიტიმ ფეხბურთელის შესახებ ოფიციალური ინფორმაცია გამოითხოვა.
გარდა ამისა, კვერნაძის გადაბირების სურვილს ინგლისისა და გერმანიის სხვა კლუბებიც იჩენენ.
რომას ინტერესი რეალურია და შესაძლებელია, დედაქალაქურმა კლუბმა ქართველი ფეხბურთელის გაფორმება ზამთრის სატრანსფერო ფანჯრის პერიოდში სცადოს, რადგან კლუბის სპორტულ დირექტორს, ტონი დამიკოს ზუსტად ასეთი უნარების მქონე გარემარბის დამატება სურს.
იტალიური გამოცემის ცნობით, ფროზინონეს უახლოეს გეგმებში კვერნაძის გაყიდვა არ შედის. კანარინი მას გუნდის საკვანძო ფიგურად მოიაზრებს და მის სანაცვლოდ მინიმუმ 25 მილიონი ევროს მიღებას გეგმავს. შეგახსენებთ, რომ გიორგის ფროსინონესთან მოქმედი კონტრაქტი 2028 წლის 30 ივნისამდე აკავშირებს, ხოლო Transfermarkt-ის ბოლო განახლებით, მისი საბაზრო ღირებულება გაორმაგდა და 4 მილიონიდან 8 მილიონ ევრომდე გაიზარდა.
