ლიონის ხელმძღვანელობამ ენდრიკის რეალში დაბრუნება დაადასტურა

ბრაზილიელი ფენომენის, ენდრიკის ხანმოკლე, მაგრამ შთამბეჭდავი თავგადასავალი საფრანგეთის ლიგა 1-ში დასრულდა.

ლიონმა მადრიდის რეალის კუთვნილ 19 წლის თავდამსხმელს ოფიციალური გამოსამშვიდობებელი სიტყვები უკვე მიუძღვნა. კლუბის სელექციის უფროსმა, მატიე ლუი-ჟანმა დაადასტურა, რომ იჯარის ვადა ამოიწურა და ფეხბურთელი სანტიაგო ბერნაბეუზე ბრუნდება.

ენდრიკი ლიონს იანვარში, 5-თვიანი იჯარით და გამოსყიდვის უფლების გარეშე შეუერთდა. სეზონის ბოლო მატჩის შემდეგ (0:4 ლანსთან), კლუბის ხელმძღვანელმა ბრაზილიელი ვარსკვლავის წასვლა ოფიციალურად დაადასტურა:

„დიახ, ჩვენ ძალიან გვინდოდა მისი შენარჩუნება, მაგრამ ამ მომენტისთვის ეს თითქმის შეუძლებელია. ენდრიკისთვის ეს ბრწყინვალე იჯარა გამოდგა, მან აქ დრო შესანიშნავად გაატარა. მისი ადაპტაციის უნარი გასაოცარი იყო, ის უკვე ლაპარაკობს ფრანგულად, რაც წარმოუდგენელია. ის კარგი ბიჭია და ბევრი რამ მოგვცა ძალიან მოკლე დროში. დღეს ეს ყველაფერი დასრულდა, დიახ.“

ბრაზილიელმა ტალანტმა საფრანგეთში ჩატარებულ 21 მატჩში 8 გოლი გაიტანა და 8 საგოლე გადაცემა შეასრულა, რამაც ლიონს ჩემპიონატში მე-4 ადგილის დაკავებასა და ჩემპიონთა ლიგის საკვალიფიკაციო ეტაპზე გასვლაში დაეხმარა. თავად ფეხბურთელი საფრანგეთში თავს ბედნიერად გრძნობდა, თუმცა საკუთარ მომავალზე საუბრისას აღნიშნა, რომ ყველაფერს ბედს მიანდობს:

„ყველაფერს დღიურად ვუყურებ. აქ ძალიან ბედნიერი ვიყავი. კარგი გუნდი, კარგი სტაფი და მეგობრები მყავს. არ ვიცი, რა მოხდება მომავალში. მე ყოველთვის ღმერთთან ვარ. რასაც ღმერთი მეტყვის, იმას გავაკეთებ, ლიონში დავრჩები თუ მადრიდში წავალ, მის ნებას დაველოდები.“

ახლა ლიონის მთავარი მწვრთნელი, პაულო ფონსეკა, სატრანსფერო ბაზარზე ენდრიკის შემცვლელის ძებნას იწყებს, რათა გუნდი ჩემპიონთა ლიგის მატჩებისთვის სრულ მზადყოფნაში იყოს.