მადრიდის რეალმა ისტორიული რეკორდი დაამყარა!

ზედიზედ ორი უტიტულო სეზონის შემდეგ, მადრიდის რეალი სატრანსფერო ბაზარზე სერიოზულად გააქტიურდა. 

როგორც ესპანური მედია წერს, ფლორენტინო პერესმა ზაფხულში თანხები არ დაიშურა და გუნდში ისეთი ფეხბურთელები მიიყვანა, როგორებიც ბერნარდუ სილვა, იბრაჰიმა კონატე, მარკ კუკურელა, დენზელ დუმფრისი, დინ ჰუისენი და კარლოს ესპი არიან. ახალმა შენაძენებმა და ვინისიუს ჟუნიორის მსგავსი ლიდერების კონტრაქტების გახანგრძლივებამ, კლუბის სახელფასო ბიუჯეტი მკვეთრად გაზარდა. 

სპეციალიზებული ანალიტიკური პორტალის, 2Playbook-ის მონაცემებით, მიმდინარე სეზონში რეალის სახელფასო ფონდი (მოთამაშეებისა და სტაფის ჩათვლით) წარმოუდგენელ 707 მილიონ ევროს შეადგენს. ეს კლუბის ისტორიაში აბსოლუტური რეკორდია და პარი სენ-ჟერმენის მიერ დამყარებულ ისტორიულ მაჩვენებელს უახლოვდება.

მიუხედავად ასეთი კოლოსალური ხარჯებისა, რეალი უეფას რეგულაციებს არ არღვევს და ფინანსურ ფეარ-პლეის იცავს. სახელფასო ფონდი კლუბის ბრუნვის 57%-ს და შემოსავლების 50%-ს შეადგენს.

აღსანიშნავია, რომ მიმდინარე სეზონში მადრიდელები კიდევ ერთ რეკორდულ შემოსავალს, 1.405 მილიარდ ევროს ელოდებიან, საიდანაც სუფთა მოგება 14 მილიონი ევრო იქნება. ამ კოლოსალური შემოსავლის უდიდესი ნაწილი, 420 მილიონი ევრო, პირდაპირ განახლებული ბერნაბეუდან გენერირდება (ბილეთები, VIP ზონები, მუზეუმი და სხვა ღონისძიებები, მათ შორის ამერიკული ფეხბურთის მატჩები). ამას ემატება ფეხბურთელების (ძირითადად აკადემიის აღზრდილების) ტრანსფერებიდან მიღებული 155 მილიონი ევროც.

ცნობისთვის, 707-მილიონიანი ბიუჯეტიდან 44.4 მილიონი ტექნიკურ სტაფსა და საკალათბურთო გუნდს ხმარდება (რომლის ბიუჯეტიც წელს 67 მილიონამდე გაიზარდა), ხოლო ქალთა გუნდის სახელფასო ფონდი 8.5 მილიონ ევროს შეადგენს. კლუბის წევრები ამ ფინანსურ ანგარიშს მომდევნო შაბათს, გენერალურ ასამბლეაზე დაამტკიცებენ.