მაიკლ კერიკის განცხადებით, მანჩესტერ იუნაიტედი მოწყურებულია უახლოეს ორ წელიწადში პრემიერ ლიგა მოიგოს და ამით კლუბის ამბიციური გეგმა წარმატებით დაასრულოს.
2024 წლის სექტემბერში, კლუბის აღმასრულებელმა დირექტორმა ომარ ბერადამ წარადგინა „პროექტი 150“. ეს არის სტრატეგიული გეგმა, რომლის მიხედვითაც იუნაიტედი ინგლისის ჩემპიონი 2028 წელს, კლუბის დაარსებიდან 150-ე საიუბილეო წელს უნდა გახდეს.
გასულ სეზონში, რუბენ ამორიმის ხელმძღვანელობით, გუნდმა მხოლოდ მე-15 ადგილი დაიკავა, თუმცა კერიკის მოსვლის შემდეგ ვითარება შეიცვალა, მანჩესტერელები პროგრესირებენ და ჩემპიონთა ლიგის ზონაში მოხვედრის კარგი შანსი აქვთ.
მიუხედავად წარმატებული სტარტისა, კერიკი ზედმეტ ეიფორიაში არ ვარდება და თვლის, რომ იუნაიტედმა ყურადღება უახლოეს მიზნებზე უნდა გაამახვილოს.
ვფიქრობ, ნაბიჯ-ნაბიჯ უნდა ვიაროთ. რა თქმა უნდა, გვსურს განვითარება და ცხრილში დაწინაურება. ამჟამინდელი პოზიცია ამაღელვებელია, რადგან რაღაცისთვის ვიბრძვით, თუმცა გვინდა, რომ ეს რაღაც უფრო მეტი იყოს ანუ რეალურად ვიბრძოლოთ პრემიერ ლიგის ტიტულისთვის.
ამას დიდი შრომა სჭირდება. პრემიერ ლიგის მოგება ძალიან რთულია და ჩვენ ეს კარგად გვესმის, თუმცა ნამდვილად ვმუშაობთ ამ მიზნისთვის. ჩვენ ადრე ვიყავით ამ სიმაღლეზე და გვსურს იქ დაბრუნება. ეს მარტივი პროცესი არ არის, მაგრამ გამარჯვების წყურვილი გვაქვს.
ამ კვირას იუნაიტედი ჩემპიონთა ლიგის საგზურისთვის ბრძოლაში უშუალო კონკურენტს, ასტონ ვილას დაუპირისპირდება. მიუხედავად იმისა, რომ მეხუთე ადგილი, დიდი ალბათობით, საკმარისი იქნება ევროპის ელიტურ ტურნირზე დასაბრუნებლად, კერიკი ცხრილს ნაკლებ ყურადღებას აქცევს:
ყველაფერი შემდეგ თამაშზეა დამოკიდებული. შეიძლება აშკარად ჟღერდეს, მაგრამ წინასწარ ვერ დაგეგმავ, მეოთხეზე გახვალ თუ მეხუთეზე. ჩვენი მთელი კონცენტრაცია მომავალ მატჩზეა მიმართული.
