საქართველოს ნაკრები 2027 წლის მსოფლიო ჩემპიონატის შესარჩევი ეტაპის მე-2 ტურის შეხვედრას ტენერიფეში, ესპანეთის ნაკრების წინააღმდეგ დღეს გამართავს.
მადრიდული MARCA-ს ინფორმაციით, ესპანელებს დღევანდელ შეხვედრაში ერთ-ერთი ლიდერი ხაიმე ფერნანდესი ვერ დაეხმარება. ამის მიზეზი მარჯვენა ბარძაყის კუნთის დაზიანებაა.
ფერნანდესი, რომელიც ტენერიფეში გიორგი შერმადინის თანაგუნდელია, ლიგა ენდესას მიმდინარე სეზონში საშუალოდ 10.9 ქულას აგროვებს, ხოლო ფიბა-ს ამ ფანჯრის პირველ თამაშში, დანიასთან 74:64 გამარჯვებისას, 15 ქულა დააგროვა და გუნდში ამ მხრივ საუკეთესო იყო. თანაც, იმ ფონზე, რომ პარკეტზე მხოლოდ 14:11 წუთი გაატარა.
ფერნანდესის გარდა, არის შანსი, ესპანეთის ნაკრებს დანი დიესიც გამოაკლდეს. დანიასთან მატჩში მარჯვენა ტერფის დაჭიმულობა მიიღო და მოედნის დატოვება მოუწია. მისი საკითხი უშუალოდ თამაშის დაწყებამდე გადაწყდება.
შეგახსენებთ, საქართველოს ნაკრებმა შესარჩევის 1-ელი ტურის მატჩი შინ უკრაინასთან წააგო, ესპანელებმა კი სტუმრად დანია 10-ქულიანი სხვაობით დაამარცხეს.
ესპანეთისა და საქართველოს ეროვნულ გუნდთა შეხვედრა თბილისის დროით 22:45 საათიდან დაიწყება.
