მარიამ ბოლქვაძე უიმბლდონის ძირითად ბადეში ითამაშებს!

მარიამ ბოლქვაძემ უიმბლდონის საკვალიფიკაციო ეტაპზე მე-3 შეხვედრაც მოიგო და ძირითად ბადეში ითამაშებს.

ქართველმა ჩოგბურთელმა, რომელიც ამჟამად WTA-ის რეიტინგის 539-ე ნომერია, საკვალიფიკაციო ეტაპის ფინალში ბელგიელი ჟელინ ვანდრომი (WTA-ს რეიტინგის 161-ე ნომერი) სამ სეტში დაამარცხა - 6:4, 4:6, 6:3.

ბოლქვაძემ პირველი წრის შეხვედრა ორ სეტში დაასრულა, როცა შესარჩევ ეტაპზე მე-12 ნომრად განთესილ ავსტრიელ იულია გრაბნერს აჯობა.

საკვალიფიკაციო ეტაპის 1/2 ფინალში კი მარიამმა იაპონელი ჰაიუ კინოშიტა (WTA-ს რეიტინგის 227-ე ნომერი) ორ სეტში დაამარცხა - 6:3; 6:2.

28 წლის ქართველი დიდი სლემის ძირითად ბადეში კარიერაში მეორედ იასპარეზებს. 2019 წელს ის ამერიკის ღია პირველობას მეორე რაუნდში გამოეთიშა.

უიმბლდონის მთავარ ბადეში მოსახვედრად კიდევ ერთი ქართველი, ეკო გორგოძე თამაშობდა, თუმცა საკვალიფიკაციო ეტაპის 1/2 ფინალში ფრანგ ლეოლია ჟენჟენთან ორ სეტში დამარცხდა - 3:6; 2:6.