ხორვატიის დედაქალაქ ზაგრებში მიმდინარე ძიუდოს გრან პრი დასკვნით ფაზაში შევიდა.
ტურნირის ბოლო საშეჯიბრო დღეს ტატამიზე კიდევ სამი ქართველი ფალავანი წარდგა, რომელთაგან მედლისკენ სვლას ყველაზე დამაჯერებლად მძიმეწონოსანი საბა ინანეიშვილი აგრძელებს.
+100 კილოგრამ წონით კატეგორიაში მოჭიდავე ქართველმა ძიუდოისტმა მერვედფინალური ბარიერი წარმატებით დაძლია. ინანეიშვილმა ავსტრიის სახელით მოასპარეზე მოვლი ბორჩაშვილს აჯობა და მეოთხედფინალში გავიდა. ახლა, ნახევარფინალის საგზურის მოსაპოვებლად, მისი მეტოქე ევგენი ბალევსკი იქნება და წინ საკმაოდ დაძაბული ბრძოლა გველის.
რაც შეეხებათ სხვა ქართველებს, 90 კილოგრამ წონით კატეგორიაში ასპარეზობას აგრძელებს ლუკა ჯავახიშვილი. მან უკვე მოიპოვა მერვედფინალში ჭიდაობის უფლება, სადაც ნორვეგიელ კორნელიუს ეილერტსენს შეხვდება. სამწუხაროდ, შეჯიბრებას უკვე გამოეთიშა თორნიკე ფოლადიშვილი (100 კგ), რომელმაც ტურნირის ადრეულ ეტაპზევე განიცადა მარცხი.
შეგახსენებთ, რომ საქართველოს ეროვნული ნაკრები ზაგრების გრან პრიზე ძირითადად ახალგაზრდული და გადახალისებული შემადგენლობით იმყოფება. მიუხედავად ამისა, გუნდს უკვე აქვს ერთი უმაღლესი სინჯის მედალი, 14 ნოემბერს 73 კილოგრამ წონით კატეგორიაში ტურნირის ჩემპიონი გიორგი ლოლაძე გახდა. ველოდებით დღევანდელი დღის ფინალურ ბლოკს და ჩვენი ბიჭების წარმატებას!
