ხორვატიის დედაქალაქ ზაგრებში მიმდინარე ძიუდოს გრან პრიზე კიდევ ორი მედლის მოპოვების რეალური შანსი გვაქვს.
საქართველოს ნაკრების წევრები, მძიმეწონოსანი საბა ინანეიშვილი (+100 კგ) და ლუკა ჯავახიშვილი (90 კგ) ტურნირზე ბრინჯაოს მედლებისთვის იჭიდავებენ.
ქართველმა ფალავნებმა წარმატებული საწყისი ეტაპების შემდეგ, სამწუხაროდ, ნახევარფინალური დაპირისპირებები დათმეს, თუმცა პოდიუმზე ასვლის უფლება ჯერ არ დაუკარგავთ. მედლებისთვის გადამწყვეტი შეხვედრები (ფინალური ბლოკი) თბილისის დროით ზუსტად 20:00 საათზე აიღებს სტარტს.
შეგახსენებთ, რომ ამ პრესტიჟულ შეჯიბრებაზე საქართველოს ნაკრები გადახალისებული, ახალგაზრდული შემადგენლობით ასპარეზობს. გუნდის აქტივში უკვე არის ერთი უმაღლესი სინჯის მედალი, რომელიც 14 ნოემბერს 73 კილოგრამ წონით კატეგორიაში გიორგი ლოლაძემ მოიპოვა. ველოდებით საღამოს და ვგულშემატკივრობთ ჩვენს ბიჭებს!
