ოთარ კაკაბაძემ პოლონეთის ექსტრაკლასას მიმდინარე სეზონში მე-2 გოლი გაიტანა. ქართველმა მცველმა არკასთან შეაგდო.
კრაკოვია სტუმრად თამაშობდა და 78-ე წუთისთვის 0:1-ს აგებდა, როცა პერკოვიჩის ჩაწოდებულის შემდეგ კაკაბაძემ ახლო მანძილიდან შეტევა გოლით დაასრულა. საბოლოოდ, მისი გუნდი მაინც დამარცხდა - 1:2.
კაკაბაძისთვის წლევანდელ ჩემპიონატში მე-4 საგოლე მოქმედებაა - 2 გოლი და 2 ასისტი. ასევე გაიტანა იაგელონიასთან და მაშინაც სტუმრად, კრაკოვიამ ის თამაშიც დათმო.
საგოლე მოქმედებების მხრივ, ქართველ განაპირა მცველს საუკეთესო შედეგი 2021-22 და 2024-25 წლების სეზონებში ჰქონდა - ორივე შემთხვევაში 3 გოლი და 2 ასისტი შეასრულა. ის სეზონებიც კრაკოვიაში გაატარა, ასე რომ, კარიერის საუკეთესო წლები აქვს სწორედ ამ პოლონურ გუნდში, რომლის კაპიტანიც გახლავთ.
10 ტურის შემდეგ, კრაკოვიას აქტივში 18 ქულაა და ცხრილის მე-3 ადგილზე იმყოფება - ლიდერ გორნიკთან სხვაობა 1 ქულაა. მომდევნო ტურში მე-14 ადგილოსან რაკოვს უმასპინძლებენ.
