მეკარის ცრემლები გასახდელში და გაუქმებული სოციალური ქსელები - დეტალები მომხდარზე

ესპანეთის ლა ლიგის მე-12 ტურში გამართული ტენერიფესა და ანდორას მატჩი უმძიმესი ტრაგედიით დასრულდა.

შეხვედრის მიწურულს, მსაჯის მიერ კომპენსირებულ დროში, ანდორას მეკარე ხესუს ოვონო ტენერიფეს მოთამაშეს, ხესუს დე მიგელს შეეჯახა. სამწუხაროდ, შეჯახების შედეგად დე მიგელს გული გაუჩერდა და მიუხედავად იმისა, რომ საავადმყოფოში დაუყოვნებლივ გადაიყვანეს, ექიმებმა მისი გადარჩენა ვერ შეძლეს.

გამოცემა AS წერს, რომ მომხდარით განადგურებული ოვონო გასახდელში ტიროდა და ლოცულობდა. მანამდე კი, როდესაც ეკვატორული გვინეის წარმომადგენელი მეკარე სტადიონს ტოვებდა, ტრიბუნებიდან გულშემატკივრები მისკენ სკანდირებდნენ: "მკვლელი, მკვლელი".

მატჩის შემდეგ ოვონომ სოციალური ქსელები გააუქმა. AS-თან საუბრისას მისმა გარემოცვამ დაადასტურა, რომ მეკარის ქმედება გამიზნული არ ყოფილა, ის უკიდურესად მზრუნველი და კეთილი ადამიანია. თავდაპირველად ოვონო გეგმავდა დე მიგელისა და მისი ოჯახისთვის ბოდიში მოეხადა და ყველანაირად დახმარებოდა მათ, თუმცა ფატალურმა შედეგმა ვითარება სრულად შეცვალა.

მომხდართან დაკავშირებით ანდორამ ოფიციალური განცხადება გაავრცელა და გარდაცვლილის ოჯახს მიუსამძიმრა. AS-ის ინფორმაციით, უახლოეს საათებში კლუბი დამატებით განცხადებებს გააკეთებს.

საშინელი ამბავი ესპანეთიდან - ტენერიფეს ფეხბურთელი გარდაიცვალა