მეტოქის კრიზისი - სენტ-ტრუიდენის მწვრთნელისთვის იბერიასთან თამაში გადამწყვეტი იქნება

ბელგიელი ქომაგები მწვრთნელის გათავისუფლებას ითხოვენ.

უეფა-ს კონფერენს ლიგის ძირითადი ეტაპის სადებიუტო მატჩის წინ, თბილისის იბერია 1999-ის მეტოქე ბელგიური სენტ-ტრუიდენი სერიოზულ კრიზისში იმყოფება.

ბელგიური გამოცემა Voetbalkrant-ის ცნობით, მეხელენთან განცდილი დრამატული მარცხის (3:4) შემდეგ, ბელგიური კლუბის გულშემატკივრები მთავარი მწვრთნელის, ფრედერიკ დე მეიერის გადაყენებას ხმამაღლა მოითხოვდნენ.

„ფრედე, წადი!“, - სკანდირებდნენ სენტ-ტრუიდენის ქომაგები ტრიბუნებიდან. გუნდმა ზედიზედ მესამე მარცხი განიცადა, რამაც ფანების მოთმინების ფიალა საბოლოოდ აავსო.

შეხვედრის დასრულების შემდეგ ფეხბურთელებს ტრიბუნებთან მივლა და განრისხებული ქომაგებისთვის ახსნა-განმარტებების მიცემა მოუხდათ.

თავად დე მეიერი აღიარებს, რომ უდიდესი წნეხის ქვეშ იმყოფება:

ეს ძალიან მძიმეა... დღე და ღამე ვმუშაობ, გუნდს ყოველ ვარჯიშზე და ყველა მოწინააღმდეგის წინააღმდეგ ვაანალიზებ.

ამავდროულად, გუნდის შემტევი ილიას სებაუი მწვრთნელის მომავალზე საუბრისას აღნიშნავს:

ეს კლუბის გადასაწყვეტია, მე ამას ვერ შევაფასებ. მწვრთნელი დავალებებს გვაძლევს და ჩვენ ვცდილობთ, ისინი რაც შეიძლება კარგად შევასრულოთ. გულშემატკივრებს სურთ, რომ მოედანზე სისხლი, ოფლი და ცრემლები ვანახოთ, ზედიზედ სამი მარცხი კი მათთვის ძალიან მტკივნეულია.

ზედიზედ განცდილი წარუმატებლობების ფონზე, ბელგიურ პრესაში ღიად წერენ, რომ 44 წლის სპეციალისტისთვის იბერია 1999-თან დაპირისპირებას შესაძლოა გადამწყვეტი მნიშვნელობა ჰქონდეს.