The Sun-ის ინფორმაციით, მანჩესტერ იუნაიტედის, რეალისა და ინგლისის ნაკრების ყოფილი ნახევარმცველის დევიდ ბექჰემის უფროსმა ვაჟმა, ბრუკლინ ბექჰემმა, მშობლებს მოსთხოვა, მასთან ურთიერთობა მხოლოდ ადვოკატების მეშვეობით ჰქონდეთ.
შეტყობინებაში ბრუკლინმა მშობლებს სთხოვა, პირდაპირ არ დაუკავშირდნენ და სოციალურ ქსელში მისი სახელი არ ახსენონ. მან აღნიშნა, რომ ურთიერთობის დალაგების ნებისმიერი მცდელობა უნდა მოხდეს პირადად და არა საჯაროდ.
სკანდალი კიდევ უფრო გამწვავდა მას შემდეგ, რაც ბრუკლინის დედამ, ვიქტორია ბექჰემმა, უფროსი შვილის მიერ გამოქვეყნებულ ქათმის რეცეპტი "დაულაიქა" [მოიწონა]. ბრუკლინმა ეს საკუთარი პირობების დარღვევად აღიქვა და სოციალურ ქსელებში მშობლები და ძმები დაბლოკა.
წყაროების თქმით, ეს ნაბიჯი პირდაპირ სამართლებრივ სარჩელს არ წარმოადგენდა და უფრო მკაცრი კომუნიკაციის საზღვრების დაწესების მცდელობა იყო. მიუხედავად ამისა, აღნიშნავენ, რომ მშობლები „სრულად დაბნეულები და განადგურებულები არიან“ მოვლენების ასეთი განვითარების გამო.
მიუხედავად დაძაბული ურთიერთობისა მშობლებთან, ბრუკლინი კვლავ ინარჩუნებს კავშირს ბებია-ბაბუებთან ორივე მხრიდან და მათთან ტელეფონითა და პირადი შეტყობინებებით ურთიერთობს.
ბრუკლინ ბექჰემსა და მის ოჯახს შორის კონფლიქტი, გავრცელებული ინფორმაციით, 2022 წლის ქორწილიდან იღებს სათავეს. დაპირისპირების ერთ-ერთ მიზეზად სახელდება უთანხმოება ნიკოლა პელტცის საქორწილო კაბასთან დაკავშირებით და ის, თუ რა როლი უნდა ეთამაშა ამ პროცესში ვიქტორია ბექჰემის მოდის ბრენდს.
მდგომარეობა კიდევ უფრო გამწვავდა მედიის გაჟონვებით, რომელიც ბრუკლინს ნიკოლას მიერ „კონტროლირებად“ ან „დამორჩილებულ“ ადამიანად წარმოაჩენდა. ბრუკლინმა და ნიკოლამ ეს ბრალდებები კატეგორიულად უარყვეს, თუმცა სწორედ ასეთმა გაჟონვებმა, მათი აზრით, ურთიერთობაში სერიოზული ბზარი გააჩინა.
