სერ დევიდ ბექჰემისა და ვიქტორია ბექჰემის უფროსმა შვილმა, ბრუკლინ პელც ბექჰემმა სოციალურ ქსელში განცხადება გაავრცელა.
"წლების განმავლობაში ჩუმად ვიყავი და ყველანაირად ვცდილობდი, ეს საკითხები პირად სივრცეში დამეტოვებინა. სამწუხაროდ, ჩემმა მშობლებმა და მათმა გუნდმა პრესასთან ურთიერთობა გააგრძელეს, რის შედეგადაც სხვა გზა არ დამიტოვეს, გარდა იმისა, რომ საკუთარი თავის დასაცავად ხმა ამომეღო და სიმართლე მეთქვა იმ სიცრუის მხოლოდ ნაწილზე, რომელიც გამოქვეყნდა.
მე არ მსურს ჩემს ოჯახთან შერიგება. არავინ მაკონტროლებს, მე პირველად ჩემს ცხოვრებაში საკუთარი თავისთვის ვარსებობ.
მთელი ჩემი ცხოვრების განმავლობაში მშობლები აკონტროლებდნენ ჩვენი ოჯახის შესახებ მედიაში გავრცელებულ ნარატივებს. სოციალური მედიისთვის განკუთვნილი მოჩვენებითი პოსტები, ოჯახური ღონისძიებები და არაავთენტური ურთიერთობები იყო იმ ცხოვრების განუყოფელი ნაწილი, რომელშიც დავიბადე.
ბოლო დროს საკუთარი თვალით დავინახე, რა უკიდურეს ზომებამდე მიდიან ისინი, რათა მედიაში უთვალავი სიცრუე გაავრცელონ, უმეტესად უდანაშაულო ადამიანების ხარჯზე, საკუთარი ფასადის შესანარჩუნებლად. თუმცა მე მჯერა, რომ სიმართლე ყოველთვის იჩენს თავს.
ჩემი მშობლები დაუღალავად ცდილობდნენ ჩემი ურთიერთობის დანგრევას, ჯერ კიდევ ქორწილამდე და ეს არ შეჩერებულა. დედაჩემმა ქორწილამდე ბოლო წუთებში გააუქმა ნიკოლას კაბის შეკერვა, მიუხედავად იმისა, თუ რამდენად გახარებული იყო ის, რომ ეს კაბა უნდა ჩაეცვა, რის გამოც სასწრაფოდ ახალი კაბის მოძებნა მოუწია.
ჩვენს დიდ დღემდე რამდენიმე კვირით ადრე, მშობლები განმეორებით ახდენდნენ ზეწოლას და ცდილობდნენ ქრთამით დავეყოლიებინე, რომ ჩემი სახელის გამოყენების უფლებებზე ხელი მომეწერა, რაც ჩემზე, ჩემს ცოლსა და ჩვენს მომავალ შვილებზე იმოქმედებდა. ისინი დაჟინებით მოითხოვდნენ, რომ ეს ქორწილამდე გამეკეთებინა, რადგან ამის შემდეგ შეთანხმების პირობები ამოქმედდებოდა. ჩემმა უარმა მათ ფინანსურ სარგებელზე იმოქმედა და მას შემდეგ ჩემ მიმართ დამოკიდებულება აღარ შეუცვლიათ.
ქორწილის დაგეგმვისას დედაჩემი იქამდე მივიდა, რომ „ბოროტი“ მიწოდა, მხოლოდ იმიტომ, რომ ნიკოლამ და მე გადავწყვიტეთ, ჩვენს მაგიდასთან დამსხდარიყვნენ ჩემი ძიძა სანდრა და ნიკოლას ბებია (ნაუნი), რადგან ორივეს ქმრები გარდაცვლილი ჰყავდათ. ორივე ჩვენი მშობელი საკუთარ მაგიდებთან ისხდნენ, რომლებიც ჩვენს მაგიდასთან თანაბრად ახლოს იყო.
ქორწილის წინა ღამეს ოჯახის წევრებმა მითხრეს, რომ ნიკოლა „ოჯახი არ არის“. იმ მომენტიდან, რაც ოჯახში საკუთარი თავის დაცვა დავიწყე, მშობლებისგან განუწყვეტელ თავდასხმებს ვიღებდი, როგორც პირადში, ისე საჯაროდ, მათი მითითებით გაგზავნილ განცხადებებს პრესაში. ჩემმა ძმებმაც კი დაიწყეს ჩემს წინააღმდეგ შეტევა სოციალურ მედიაში, სანამ საბოლოოდ გასულ ზაფხულს მოულოდნელად არ დამბლოკეს.
დედაჩემმა ქორწილში პირველი ცეკვა ჩამომართვა, რომელიც კვირებით ადრე იყო დაგეგმილი, როგორც რომანტიკული სიყვარულის სიმღერა. 500 სტუმრის წინ მარკ ენტონიმ დამიძახა სცენაზე, სადაც გრაფიკის მიხედვით მე და ჩემს ცოლს უნდა გვეცეკვა, თუმცა ამის ნაცვლად დედაჩემი მელოდებოდა ცეკვისთვის. მან სრულიად შეუფერებლად იცეკვა ჩემთან ყველას თვალწინ. ჩემს ცხოვრებაში არასდროს მიგრძვნია ასეთი დისკომფორტი და დამცირება.
ჩვენ გვინდოდა ფიცის განახლება, რათა ქორწილის დღიდან ახალი მოგონებები შეგვექმნა, სიხარულითა და ბედნიერებით სავსე და არა შფოთვითა და სირცხვილით.
ჩემი ცოლი მუდმივად განიცდის უპატივცემულობას ჩემი ოჯახის მხრიდან, მიუხედავად იმისა, რამდენად ვცდილობდით ერთიანობის პოვნას. დედაჩემი არაერთხელ იწვევდა ჩემს წარსულთან დაკავშირებულ ქალებს ჩვენს ცხოვრებაში ისე, რომ აშკარად ორივესთვის არასასიამოვნო გარემო შეექმნა.
ამის მიუხედავად, ჩვენ მაინც ჩავედით ლონდონში მამაჩემის დაბადების დღეზე და მთელი კვირის განმავლობაში იგნორირებულები ვიყავით სასტუმროში, როცა ვცდილობდით მასთან ხარისხიანი დრო გაგვეტარებინა. ის ყველა მცდელობას უარყოფდა, გარდა იმ შემთხვევისა, თუ ეს მის დიდ დაბადების დღეზე მოხდებოდა, ასობით სტუმრისა და ყველგან განთავსებული კამერების ფონზე.
ბოლოს, როცა დამთანხმდა შეხვედრაზე, პირობა იყო, რომ ნიკოლა არ იქნებოდა მიწვეული. ეს ჩემთვის დიდი შეურაცხყოფა იყო. მოგვიანებით, როცა ჩემი ოჯახი ლოს-ანჯელესში ჩამოვიდა, მათ საერთოდ უარი თქვეს ჩემთან შეხვედრაზე.
ჩემი ოჯახი ყველაფერზე მაღლა აყენებს საჯარო პოპულარიზაციასა და რეკლამებს. ბრენდი ბექჰემი ყოველთვის პირველ ადგილზეა. ოჯახური „სიყვარული“ იზომება იმით, რამდენს აქვეყნებ სოციალურ მედიაში, ან რამდენად სწრაფად ტოვებ ყველაფერს, რათა გამოჩნდე და იპოზიორო ოჯახური ფოტოსთვის, თუნდაც ეს ჩვენი პროფესიული ვალდებულებების ხარჯზე ხდებოდეს.
წლების განმავლობაში ყველაფერს ვაკეთებდით, რომ მხარი დაგვეჭირა ყველა მოდის ჩვენებაზე, ყველა წვეულებაზე და ყველა პრესაქტივობაზე, რათა გვეჩვენებინა „ჩვენი იდეალური ოჯახი“. მაგრამ ერთხელ, როცა ჩემმა ცოლმა დედაჩემს მხარდაჭერა სთხოვა ლოს-ანჯელესის ხანძრების დროს უსახლკაროდ დარჩენილი ძაღლების გადასარჩენად, დედაჩემმა უარი თქვა.
ნარატივი, თითქოს ჩემი ცოლი მაკონტროლებს, სრულიად საპირისპიროა სიმართლის. მთელი ჩემი ცხოვრების განმავლობაში მე მშობლების კონტროლის ქვეშ ვიყავი. ბავშვობიდანვე ძლიერი შფოთვა მქონდა. პირველად ჩემს ცხოვრებაში, მას შემდეგ რაც ოჯახს დავშორდი, ეს შფოთვა გაქრა. ყოველ დილით ვიღვიძებ მადლიერებით იმ ცხოვრების გამო, რომელიც ავირჩიე, და ვგრძნობ სიმშვიდესა და შვებას.
მე და ჩემს ცოლს არ გვინდა ცხოვრება, რომელიც იმიჯზე, პრესასა და მანიპულაციაზეა აგებული. ერთადერთი, რაც გვინდა, არის მშვიდობა, პირადი სივრცე და ბედნიერება ჩვენთვის და ჩვენი მომავალი ოჯახისთვის." - წერს ბრუკლინი სოციალურ ქსელში.
მხოლოდ ადვოკატის მეშვეობით — ბრუკლინ ბექჰემმა მშობლებს პირდაპირი კონტაქტი აუკრძალა
