მადრიდის რეალისთვის ეს სეზონი იმედგაცრუების, დაძაბულობისა და გაურკვევლობის სიმბოლოდ იქცა.
ამ ქაოსის ცენტრში კი ალვარო არბელოა აღმოჩნდა, რომელმაც გუნდი სეზონის შუაში ჩაიბარა, თუმცა საწყისი ოპტიმიზმი მალევე გაქრა.
კონტროლდაკარგული გასახდელი
ბოლო კვირებში მადრიდელთა ბანაკში დაძაბულობამ პიკს მიაღწია. ბევრი მიიჩნევს, რომ არბელოამ კონტროლი დაკარგა ფეხბურთელებზე, რომელთა ურთიერთობაც იმდენად დაიძაბა, რომ მისი გამოსწორება, შესაძლოა, შეუძლებელიც კი იყოს. თუმცა, მთელი პასუხისმგებლობის მწვრთნელზე დაკისრება სამართლიანი არ იქნება.
ფეხბურთელების ნაწილმა სეზონის კრიტიკულ მომენტებში არასათანადო დამოკიდებულება აჩვენა. იქმნება შთაბეჭდილება, რომ გუნდმა მენტალურად დანებება არჩია. არბელოა კი ამ პრობლემებთან მარტო დარჩა. მაგალითად, ვალვერდესა და ჩუამენის შორის მომხდარი ინციდენტის დროს, ის ერთადერთი საჯარო ფიგურა იყო, ვინც სიტუაციის განმუხტვას ცდილობდა, მაშინ როცა კლუბის ხელმძღვანელობა დუმდა.
ლიდერების დეფიციტი
მთავარი პრობლემა, რომელზეც მადრიდში საუბრობენ, გასახდელში ავტორიტეტის ნაკლებობაა. ბენზემასა და მოდრიჩის წასვლის შემდეგ, რეალმა ის პიროვნებები დაკარგა, რომლებიც კრიზისულ მომენტებს მართავდნენ.
ამის ნათელი მაგალითი ბოლო ელ კლასიკო იყო: კარვახალისა და ვალვერდეს არყოფნაში, კაპიტნის სამკლაური ვინიისიუს ჟუნიორმა მოირგო. ბევრისთვის ეს სურათი კლუბში არსებული გაურკვევლობის იდეალური ასახვაა.
მადრიდში ახლა მხოლოდ ერთი კითხვა ისმის: რა იქნება შემდეგ? გულშემატკივრები პასუხებს ელიან, თუმცა კლუბის მხრიდან სამომავლო გეგმა ჯერჯერობით არ ჩანს.
