ინგლისის ნაკრები თომას ტუხელის ხელმძღვანელობით ფლორიდაში ჩაფრინდა, სადაც მსოფლიო ჩემპიონატის დაწყებამდე სპეციალურ საწვრთნელ შეკრებას გაივლის.
გუნდის კაპიტანმა, ჰარი კეინმა და მთავარმა მწვრთნელმა უკვე ღიად დააფიქსირეს თავიანთი უმთავრესი მიზანი - მუნდიალზე ოქროს მედლების მოპოვება.
ტუხელის 26-კაციანი შემადგენლობა პალმ ბიჩში დაბინავდა, რათა 17 ივნისს, ხორვატიის წინააღმდეგ გასამართ სასტარტო მატჩამდე ადგილობრივ კლიმატსა და პაპანაქება სიცხეს შეეგუოს. გუნდს მოგვიანებით შეუერთდებიან ბუკაიო საკა, დეკლან რაისი, ნონი მადუეკე და ებერეჩი ეზე, რომლებმაც ჩემპიონთა ლიგის ფინალში თამაშის გამო დასვენებისთვის დამატებითი დრო მიიღეს. მარკუს რეშფორდი კი, რომელიც მაიამიში ინდივიდუალურად ემზადებოდა, უკვე ნაკრებთანაა.
ჰარი კეინმა სრულად დაუჭირა მხარი ტუხელის მიდგომას, რომელიც აქცენტს არა ინდივიდუალურ ვარსკვლავებზე, არამედ გუნდურ ქიმიაზე აკეთებს. კაპიტნის თქმით, გარეთ საუთგეიტის დროს დაწყებული ერთიანობის პროცესი ახლა პიკშია და გუნდისგან ყველა ტიტულის მოგებას ელის.
ინგლისის ნაკრების ახალ დოკუმენტურ ფილმში (Building The Dream) გამოჩნდა კადრები, სადაც ტუხელი ფეხბურთელებს პირველივე შეხვედრაზე მკაფიო დავალებას აძლევს:
„ჩვენი მისია ძალიან, ძალიან ნათელია, გვინდა გავხდეთ მსოფლიო ჩემპიონები და მაისურზე მეორე ვარსკვლავი დავიხატოთ. მინდა, რომ ამაზე პირდაპირ ვისაუბროთ. მხოლოდ ფეხბურთი, ტაქტიკა და სტანდარტულები საკმარისი არ არის. ერთ-ერთ მსოფლიო ჩემპიონს ვესაუბრე და მითხრა, რომ მეოთხედფინალსა და ფინალს შორის განსხვავება არა სათამაშო კლასი, არამედ გუნდის საძმოდ ქცევაა, როცა მოთამაშეები მზად არიან მოედანზე ერთმანეთისთვის თავი გასწირონ.“
მუნდიალის დაწყებამდე ინგლისის ნაკრები ფლორიდაში ორ ამხანაგურ შეხვედრას გამართავს - შაბათს ტამპაში ახალ ზელანდიას დაუპირისპირდება, მომდევნო ოთხშაბათს კი ორლანდოში კოსტა რიკას შეხვდება.
