ნაგელსმანი კრიტიკის ქარცეცხლში - გერმანელი ლეგენდები მწვრთნელს უტევენ

გერმანიის ნაკრების ორმა ყოფილმა ვარსკვლავმა იულიან ნაგელსმანის მიერ დენიზ უნდავის მიმართ გამოჩენილი დამოკიდებულება გააკრიტიკა.

დორტმუნდის ბორუსიას ლეგენდამ, რომან ვაიდენფელერმა Sky-ის ეთერში განაცხადა, რომ ნაკრების მწვრთნელმა საკუთარ თავს ავნო, როდესაც ჯერ მკაცრი პოზიცია დაიკავა, შემდეგ კი საჯაროდ მოიხადა ბოდიში.

დაპირისპირება მარტის ამხანაგურ მატჩს უკავშირდება, სადაც გერმანიამ განა 2:1 დაამარცხა. მიუხედავად იმისა, რომ შტუტგარტის თავდამსხმელმა გამარჯვების გოლი გაიტანა, ნაგელსმანმა ის საჯაროდ გააკრიტიკა. მწვრთნელმა ეჭვქვეშ დააყენა უნდავის ფიზიკური კონდიციები და აღნიშნა, რომ ფეხბურთელის სურვილი, მოხვდეს სასტარტო შემადგენლობაში, მასზე ზედმეტ წნეხს ქმნის. „ჩემთვის პრობლემა არაა, თუ ის ნაკლებ გოლს გაიტანს“, - დასძინა მაშინ ნაგელსმანმა.

მოგვიანებით მწვრთნელმა პოზიცია შეცვალა და MagentaTV-ის ეთერში ბოდიში მოიხადა. მისი თქმით, კრიტიკა ზედმეტად მკაცრი იყო და ამ დასკვნამდე მისვლაში მეუღლე ლენა დაეხმარა. „ამით ის საკუთარ თავს კი არ აძლიერებს, არამედ პირიქით - ასუსტებს“, - აღნიშნა ვაიდენფელერმა. მას დაეთანხმა ოლივერ კანიც, რომელმაც კითხვის ნიშნის ქვეშ დააყენა მწვრთნელის გადაწყვეტილება, ეს თემა საჯაროდ განეხილა.

კანის თქმით, ნაგელსმანს შეეძლო უბრალოდ ტელეფონით დაერეკა ფეხბურთელისთვის და პირადად მოეხადა ბოდიში. ნაგელსმანმა დაადასტურა, რომ უნდავს ბოდიში მომდევნო დღესვე მოუხადა და ფეხბურთელმაც გაუგო მას. მიუხედავად ამისა, მწვრთნელი შტუტგარტის ფავორიტს სასტარტო შემადგენლობის წევრად კვლავ ვერ ხედავს.

შტუტგარტში უნდავი შეუცვლელი ფიგურაა - 40 მატჩში მან 23 გოლი გაიტანა და 13 საგოლე გადაცემა შეასრულა. ამ მაჩვენებლით ის ამ სეზონში ყველაზე სახიფათო გერმანელი ფორვარდია. კლუბს მისი კონტრაქტის გახანგრძლივება სურს, თუმცა 29 წლის ფეხბურთელი, გავრცელებული ინფორმაციით, სარეკორდო ხელფასს ითხოვს. აღსანიშნავია, რომ სანაკრებო პაუზის შემდეგ უნდავს გოლი ჯერ არ გაუტანია და ჰამბურგთან მატჩში პენალტიც კი გააფუჭა.