ჩელსის თავდამსხმელმა ჟოაო პედრომ თავისი კლუბელი კოულ პალმერის შესახებ სენსაციური განცხადება გააკეთა და აღნიშნა, რომ ინგლისელი პლეიმეიკერი ბრაზილიის ნაკრების ლეგენდარულ 10-ნომრიან მაისურს იდეალურად მოირგებდა.
ორივე ფეხბურთელი მიმდინარე ზაფხულს მსოფლიო ჩემპიონატის მიღმა დარჩა, რადგან საკუთარ ნაკრებებში ვერ მოხვდნენ.
რიო ფერდინანდის პოდკასტში სტუმრობისას, 24 წლის ბრაზილიელმა აღიარა, რომ თავიდან პალმერის ნიჭს სათანადოდ არ აფასებდა, თუმცა მასთან ერთად თამაშის შემდეგ აზრი შეეცვალა.
ის ძალიან ჭკვიანია, მოედანზე ნამდვილ მაგიას ქმნის. ადრე ვუთხარი კიდეც, რომ ასეთი კარგი არ მეგონა. ახლა კი ვეუბნები: წამოდი ბრაზილიაში, აიღე მე-10 ნომერი და პრობლემა არ იქნება. ბრაზილიაში ჩვენ ასეთი სტილის მოთამაშე არ გვყავს, ტაქტიკურად 4-2-4 სქემით ვთამაშობთ და სუფთა ათიანი გვაკლია
მიუხედავად ჩელსიში ჩატარებული ბრწყინვალე სეზონისა, თომას ტუხელმა პალმერი ინგლისის ნაკრების მუნდიალის განაცხადს მიღმა დატოვა და აქცენტი ტაქტიკურ დისციპლინაზე გააკეთა. მსგავსი ბედი ეწია თავად ჟოაო პედროსაც, რომელიც ჩელსის სეზონის საუკეთესო მოთამაშედ დასახელდა, თუმცა კარლო ანჩელოტიმ ბრაზილიის ნაკრებში გამოცდილ ფეხბურთელებსა და ნაკრებში ნეიმარის დაბრუნებას მიანიჭა უპირატესობა.
მიუხედავად ამისა, პედრო ანჩელოტის მიდგომებს სრულად უჭერს მხარს და დარწმუნებულია, რომ ბრაზილია 24-წლიანი პაუზის შემდეგ მსოფლიო ჩემპიონობას მოიპოვებს. მან თანაგუნდელის ნაკრებს სარკასტულადაც უკბინა და აღნიშნა, რომ მეოთხედფინალში ბრაზილია ინგლისს აუცილებლად დაამარცხებს.
