ოჯახის კაცი, რომელსაც შემწვარი კარტოფილი ძალიან უყვარს - დე ლა ფუენტე კარიერის მიღმა

მადრიდულმა გამოცემა MARCA-მ ესპანეთის ნაკრების მთავარ მწვრთნელ ლუის დე ლა ფუენტეს ცხოვრებასა და მის ღირებულებებზე სტატია გამოაქვეყნა. განვლილი საფეხბურთო გზა, ტრადიციებისა და რელიგიის სიყვარული, მუსიკით გატაცება და გასტრონომიული გემოვნება. საინტერესოა, გადავხედოთ, რა კაცია და როგორ ცხოვრობს მსოფლიოს ერთ-ერთი უძლიერესი ნაკრების მთავარი მწვრთნელი.

ევროპის მოქმედი ჩემპიონი, ლუის დე ლა ფუენტე თავისი პროფესიული წარმატებებით ცნობილია, თუმცა მისი პროფესიის მიღმა ცხოვრებაც საინტერესოა. 1961 წელს, ჰაროში (ლა რიოხა) დაიბადა და ყოველთვის ყურადღების ცენტრში იყო.

ფურია როხას თავკაცი სევილიელ ქალბატონზეა დაქორწინებული და სამი შვილი ჰყავთ. მისი ვაჟი, ალბერტო, ფეხბურთის სამყაროში მამის კვალს გაჰყვა, თუმცა ტექნიკურ სფეროში. უესკაში მეთოდოლოგიური დირექტორისა და ანალიტიკოსის კარიერის დაწყების შემდეგ, ამჟამად ესპანეთის სამეფო ფეხბურთის ფედერაციის (RFEF) ახალგაზრდულ გუნდებში ანალიტიკოსად მუშაობს. ლუის დე ლა ფუენტემ არაერთხელ გამოხატა აღფრთოვანება შვილის მუშაობით, ხაზი გაუსვა მის მომზადებასა და შრომისმოყვარეობას.

საფეხბურთო კარიერა

ლუის დე ლა ფუენტე ფეხბურთს თამაშობდა და პოზიციით მარცხენა მცველი იყო. კარიერა ატლეტიკ ბილბაოში დაიწყო, სადაც მან ყველაზე დიდ წარმატებას მიაღწია, მათ შორის ლა ლიგის ორი ტიტული და კოპა დელ რეი მოიგო.

ბილბაოს შემდეგ, ის ასევე თამაშობდა სევილიასა და ალავესში, სადაც კარიერა დაასრულა. წარმატებული სამწვრთნელო საქმიანობის დაწყებამდე, პირველი დივიზიონის 250-ზე მეტი მატჩი ჩაატარა.

ტრადიციები

დე ლა ფუენტე ცნობილია თავისი რელიგიურობით. ის რეგულარულად ესწრება ყოველდღიურ წირვას და ინარჩუნებს ახლო ურთიერთობას მშვიდობის ქალწულთან, მისი მშობლიური ქალაქის მფარველ წმინდანთან. ის ასევე აქტიურად მონაწილეობს ჰაროს დღესასწაულებში, განსაკუთრებით ღვინის ბრძოლაში, ტრადიციაში, რომელსაც ის ყოველწლიურად ენთუზიაზმით აღნიშნავს.

მუსიკის მოყვარული მწვრთნელი

სპორტის გარდა, დე ლა ფუენტეს მუსიკისადმი დიდი გატაცება აქვს. ის კარაოკეს მოყვარულია და რამდენჯერმე სცენაც გაიზიარა. მისი ერთ-ერთი მუსიკალური კერპი ხულიო იგლესიასია, რომელსაც უბრალოდ აღმერთებს.

ერთ-ერთი წვეულებისას, მეგობარ პაჩი სალინასთან ერთად, იგლესიასის სიმღერაც კი შეასრულა, რითაც მუსიკისადმი და ესპანელი მომღერლისადმი სიყვარული გამოხატა.

მჭიდრო კავშირი ფესვებთან

პროფესიული წარმატების მიუხედავად, დე ლა ფუენტე ინარჩუნებს მტკიცე კავშირს ჰაროში მდებარე თავის ფესვებთან. ის სხვადასხვა ინტერვიუებში უსვამს ხაზს, რომ ოჯახი, მეგობრები და ბავშვობის მოგონებები მისთვის ფუნდამენტურია. მშობლიურ ქალაქში, მის პატივსაცემად, საფეხბურთო ტურნირი დაარსდა და მუნიციპალური სტადიონი გაიხსნა.

ოჯახის კაცი, რომელსაც შემწვარი კარტოფილი და კვერცხი ძალიან უყვარს

მოკლედ, ლუის დე ლა ფუენტე ოჯახის კაცი, მორწმუნე და რელიგიური ადამიანია, მუსიკით გატაცებული და საკუთარ ტრადიციებსა და ფესვებს ღრმად ჩაჭიდებული. მისი პირადი ცხოვრება ასახავს იმავე ღირებულებებს, როგორიცაა ერთგულება, თავდადება და თავმდაბლობა, რასაც ის თავის პროფესიულ კარიერაშიც გამოხატავს.

შემწვარი კარტოფილი და კვერცხი წლების განმავლობაში მისი სისუსტე იყო. მიუხედავად იმისა, რომ ცდილობს თავი შეიკავოს შემწვარი კარტოფილის ჭამისგან, ცდუნებას ვერ უძლებს და კვერცხის გულში ამოვლებულ პურის ნაჭერთან ერთად მიირთმევს, რასაც "აბსოლუტურ სიამოვნებას" ეძახის.

მისი მეორე სიამოვნება პირველის ტრადიციას მიჰყვება. მეღვინე არ მალავს რიოხას კარგი ღვინისადმი სიყვარულს. ყოველ შესაძლებლობაზე, ჩერდება და სვამს, რადგან მას აღმატებულ სიამოვნებად და თავისი კულტურული მემკვიდრეობის განუყოფელ ნაწილად მიიჩნევს.