ოფიციალურად - გიორგი არაბიძე ტორპედოში დაბრუნდა

გიორგი არაბიძე ტორპედო ქუთაისში დაბრუნდა. ამის შესახებ ინფორმაცია თავად კლუბმა გამოაქვეყნა.

კლუბისვე მიხედვით, მხარეებმა კონტრაქტი 1+2 სისტემით გააფორმეს - თუკი მომდევნო, 2026 წლის სეზონის ბოლოს ურთიერთთანამშრომლობის სურვილი ექნებათ, ხელშეკრულებას კიდევ 2 წლით გაახანგრძლივებენ.

გიორგი არაბიძე იმერულ გუნდში 2022-2024 წლებში თამაშობდა და მისი მაისურით 86 მატჩში მიიღო მონაწილეობა - აქტივში 26 გოლი და 21 შედეგიანი გადაცემა ჩაიწერა.

27 წლის არაბიძე ბოლოს კორეულ ულსან ჰიუნდაიში გამოდიოდა, სადაც სწორედ ტორპედოდან გადავიდა. აზიური კლუბი, რომელთან ერთადაც 2024 წლის კორეის ჩემპიონატის გამარჯვებული გახდა, 2025 წლის 7 იანვარს დატოვა და მას შემდეგ უგუნდოდ იყო.

არაბიძემ ულსანს ფიფა-ში უჩივლა და სამართლებრივი დავა ჰქონდა. სამხრეთ კორეული მედიის მიერ აგვისტოში გავრცელებული ცნობებით, ფეხბურთელმა საქმე მოიგო და კლუბს მისთვის 2.5 მლნ ევრომდე მართებს.